Polítika poupansa ba orsamentu jéral estadu nudar komprimisiu Primeiru Ministru, Rui Maria de Araújo bainhira asume ninia responsabilidade nudar xefi governu.
Redus orsamentu ba snack iha atividade sira hanesan workshop, seminariu nomos inkontru entre nivel direitór no xefi departementu sira nudar realizasaun ba polítika poupansa.
Mais, importante atu realiza polítika poupansa ho efetivu mak haree mos ba salariu asesór sira, tantu nasionál nomos internasionál.
Imajina, kuandu departementu ou gabinete ida mak ho asesór nain tolu ou lima, sira ne’e ho salariu kada fulan hosi $5000 ou rihun $16. Sé kuandu salariu sira ne’e mak tau hamutuk ba eskola primaria ida hodi hadi’a sanitasaun ou kompleta biblioteka, konserteza ninia rezultadu sei hatudu ninia kualidade iha prosesu aprendizajen ba futuru nasaun ne’e nian.
Entaun, atu kompremeta polítika ba dezenvolvimentu iha area edukasaun nomos saúde, solusaun importante ida mak redus salariu asesór internasionál no nasionál. Sé la’e kada tinan, gastu sira ne’e hatodan de’it orsamentu estadu ne’ebé ninia benefisiu ba de’it grupu balun.
Solusaun seluk tuir direitór organizasaun naun govermentais Luta Hamutuk, Mericio Akara katak, ukun nain sira ne’ebé ukun presiza valoriza mos Timor-oan sira ne’ebé kompleta ona sira nian akademia iha lisensiatura, magistradu nomos dotoramentu.
Liga ba salariu asesór nasionál no internasionál sira hanesan injustisa ne’ebé ukun nain sira kria iha Repúblika Demokratika de Timor-Leste. Tanbasá injustisa? Ezemplu mak haree de’it saida mak eis veterana, Madalena Soares Kasian, halo ba estadu no nasaun ida ne’e. Ema lubun bo’ot ne’ebé sei sai jerasaun ba nasaun ida ne’e nian mak sente ninia benefisiu.
Entretantu, benefesiu saida mak nasaun no povo ne’e sente ho salariu dollar atus ba atus no rihun ba rihun ne’ebé estadu ne’e selu ba asesór sira.
“Primeiru Ministru nia ko’alia la-han malu ho promesa ba poupansa osan estadu nian. Ha’u nia proposta mak ne’e, hapara asessór internasionál, tanba tempu ona Timor sira hanesan S1, S2, S3 bele halo servisu”, Mericio Akara komenta ba diariu ne’e iha Palapasu, Segunda, (12/10).’
Kestaun salariu ba asesór sai mos preokupasaun iha funsionariu públiku sira nian le’et. Servidór estadu sira mos presiza hetan direitu ne’ebé dignu atu servi povo no estadu ne’e. Bainhira, ukun nain sira la-valoriza, problema korupsaun, kolusaun no nepotismu sei buras iha instituisaun estadu sira.
Aleinde ne’e, atu hametin soberanu estadu sei sai kestaun ne’ebé esensial. Imajina tan, oinsá servisu alfandega, karantina, imigrasaun no sira seluk ne’ebé importante atu servisu di’ak, kuandu fulan ida manan salariu ho level 4 ou 5 maibé oras ida ka oras rua tenki simu amplop ho osan dollar $500 ou liu. Entaun, poupansa tenki haree ba aspeitu hotu labele de’it ba snack. (*)
Tidak ada komentar:
Posting Komentar