NORMALMENTE, tuir rejimentu Parlamentu Nasionál (PN) artigu 162, kada tinan governu tenki aprejenta proposta no planu Orsamentu Jéral Estadu (OJE) ba PN iha loron 15 fulan-Outubru. Maibé, durante ne’e saida mak ko’alia iha rejimentu, kuaze atu la-akontese.
Aliende ne’e, kestaun ne’ebé interesante iha debate OJE 2016 mak mosu duvidas hosi bankada parlamentar Partidu Demokratiku (PD) kona-ba diskusaun espesialidade iha komisaun eventual.
“PD La-simu tanba razaun tolu. Primeiru, komisaun eventual la-tuir rejimentu Parlamentu Nasionál tanba laiha artigu ida mak hakerek kona-ba komisaun eventual, segundu komisaun eventual taka dalan ba partisipasaun masimu deputadu sira nian iha dabate hodi espresa sira nia hanoin, tanba buat ne’ebé komisaun eventual deside sei la-debate tan iha plenária, terseriu, membru hosi partidu haat hola parte hotu iha ukun ida ne’e, tanba ne’e diskusaun iha Parlamentu Nasionál tenki nakloke ba deputadu sira hotu hodi halo balansu ba desizaun polítika”, deputada, Maria Lourdes Bessa nudar Prezidenti bankada hato’o deklarasaun polítika iha debate jeneralidde OJE 2016 iha PN.
Artigu 167 rejimentu PN ne’ebé ko’alia kona-ba diskusaun no votasaun ba espesialidade, alinea 2 hatete, debate espesialidade ba proposta lei no planu orsamentu estadu ninia hala’o iha plenária. Entaun, saida mak agora dadaun bankada parlamentar sira kria, absolutamenta kontra rejimentu.
Maibé, komisaun eventual la’os buat foun ba bankada parlamentar sira iha parlamentu. Tantu opozisaun nomos sira ne’ebé antes ne’e forma governu. Agora, tanbasá mak periode ne’ebé atu la’o ba datoluk, mosu kestaun hosi PD. Tuir loloos, preokupasaun tenki mosu desde hahú.
Seluk ne’ebé interesante mak atual Prezidente Rejiaun Administrativa Espesiál Oekusi Ambenu (RAEOA) no Zona Ekonómia Espesiál Sosial Merkadu (ZEESM), Marí Alkatiri, daudaun ne’e foti fali ninia direitu nudar deputadu iha uma fukun.
Regras normais, hanesan autoridade RAEOA, Mari Alkatiri, halo relatoriu ba governu, no orgaun ezekutivu hatan ba legislativa. Momentu ne’e, oinsá deputadu Alkatiri ninia pozisaun atu kestiona lalaok no polítika implementasaun orsamentu estadu ne’ebé akontese iha Enklave?
Situasaun ne’ebé komplikadu. Kuandu, liga fali ba rejimentu internal parlamentu artigu 5 ne’ebé ko’alia kona-ba subtituisaun temporariu nomos artigu 7 sobre lakon mandatu. Em-termus legais, tuir loloos labele atu akontese.
tempu ona atu polítiku sira, tantu iha parlamentu nomos palasiu governu tenki hanorin polítika ‘honestu’ ba foin sa’e sira ho objetivu kaderiza jerasaun foun. Kumpri regras normais no legais sira nudar ezemplu ida atu povo banati. Oinsá ita atu hatete ba povo para kumpri lei, sé kuandu ita rasik la-hatudu hahalok respeitu ba lei. Kuantidade lei ne’ebé aprova iha uma fukun to’o palasiu governu la’os sasukat, importante mak ninia kualidade iha implementasaun. (*)
Tidak ada komentar:
Posting Komentar