HYUNDAI Engineering and Construction nudar kompañia internasionál hosi Korea do Sul ne’ebé manan tender ba projetu tasi mane ho valor orsamentu milliaun $719, hasoru problema ho Tribunál Câmara de Contas (TCC).
Rezultadu auditoriu TCC relata, prosesu kontratu ne’ebé governu liu-hosi Ministériu Petroleu Rekursu no Minarais halo ho HYUNDAI mosu irregularidade tanba konsidera viola lei aprovizionamentu.
“Kuandu tribunál contas rejeita vistu ne’e, kontratu ne’e nulu, konsidera kontratu ne’e nunka akontese. Nulu signifika tenki halo fila fali prosesu foun ba eskolla atu bele tama fali. La-vale ka nunka akontese mesmu ita halo mas viola lei aprovizionamentu, entaun konsidera hanesan halo kontratu, maibé nunka iha kontratu”, Prokuradór Jéral Repúblika, José Ximenes esplika ba diáriu ne’e hafoin tomada de posse ba prokuradór foun sira iha Kolmera, Sabadu, (7/11).
Ho konsiderasaun ne’e, governu liu-hosi ministru, Alfredo Pires, hato’o ona rekursu hodi kontra desizaun TCC. Pozisaun ne’e, parte ministériu públiku sei estuda ba dokumentus ne’ebé governu aprejenta iha ninia rekursu.
Hosi kazu ne’e, saida mak TCC halo hodi deskobre irregularidade ne’ebé akontese nudar pasu importante atu salva osan estadu, hodi haree liu ba kestaun kualidade.
Tanba saida mak akontese, kompañia refere hetan ‘kastigu’ hosi ninia governu durante tinan rua no fulan neen tanba komete krime kolusaun. Maibé, kompañia ne’e konsege liu prosesu tenderizasaun ba projetu tasi mane ho nia valor osan millaun $719.
Perguntas no diskusaun ne’ebé interesante. MPRN ne’ebé lidera hosi Alfredo Pires no Comissão Nasionál Aprovizionamentu (CNA) ninia prestasaun servisu presiza hetan avaliasaun.
Sé kuandu, CNA ho MPRN mak halo ninia servisu ho responsabilidade hodi haree didiak dokumentus ne’ebé kompañia aprejenta ho detallu nomos buka informasaun sira, konserteza TCC la-anula prosesu ne’e, hanesan saida mak agora dadaun akontese.
Tanba ne’e, saida mak akontese ona. Parte kompetente presiza halo notas hodi saida mak akontese, labele akontese fali ba futuru.
Governu ho ninia pozisaun ne’ebé firme, ho esperansa sei la-akontese intervensaun iha prosesu justisa. Tanba orgaun estadu ne’e ho ninia separasaun poder atu hala’o ninia kna’ar tuir lei haruka.
Entretantu, desizaun ne’ebé TCC foti, ukun nain sira ne’ebé foti desizaun polítika tenki halo evaluasaun servisu ba sira ne’ebé simu responsabilidade iha verifikasaun ba dadus. Abut hosi irregularidade ne’ebé konsidera, sei akontese mudansa iha loron ikus. Ita Hein. (*)
Tidak ada komentar:
Posting Komentar