‘Funu’ Fronteira Maritima

Repúblika Demokratika de Timor-Leste (RDTL) ho nasaun viziñu Austrália kontinua halo ‘funu’ hodi hetan soberanu total ba fronteira maritima.

Reasaun dahuluk iha semana ne’e mai hosi Ministra Negósiu Estranjeiru Austrália, Julia Bishop, afirma, bazeia ba akordu ne’ebé fornese ba dezenvolvimentu kooperativu kona-ba rekursus petrolíferu no gas iha Tasi Timor, Austrália kontinua mantein tanba tratadu sira ne’e Austrália ho TL rasik konkorda ona adia delimitasaun fronteira marítima to’o tinan 50.

Entretantu ho firme, governu Timor-Leste kontinua mantein pozisaun hodi diskute ho Austrália kona-ba fronteira marítima nian molok tinan 50.

Tuir akordu ne’ebé governu Austrália ho TL asina iha 2006 kona-ba Certain Maritime Arrangament on the Timor Sea (CMATS) hatete, sei la-ko’alia kona-ba fronteira marítima durante tinan 50.

“Akordu ne’e tuir loloos naran país ne’e, ida hatete dehan akordu (CMATS) ne’e la-vale, prontu ne’e la-vale ona. Timor-Leste la-konkorda atu periodu ida tinan 50 ne’e mantein nafatin”, Primeiru Ministru, Rui Maria de Araújo, afirma ba jornalista sira bainhira remata sorumutu ho Prezidente Repúblika iha Palasíu Prezidensial Bairopite, Kinta (29/10).

Ho kestaun ne’ebé komplikadu no sensitivu, estadu RDTL estabelese ona entidades tolu iha konsellu ida ho naran Konsellu Definitiva Delimitasan Frontreira Marítima (KDDFM), hodi buka solusaun ne’ebé kumpri mekanismu internasionais.

Aleinde ne’e, Komisaun Konsultiva hanesan orgaun konsultiva supremu ba asuntu delimitasaun final frontreira marítima prezide hosi Primeiru Ministru, eis Prezidenti Repúblika, eis Primeiru Ministru, eis Prezidente Parlamentu Nasionál, no Ministru Negósiu Estranjeirus, inklui intelektuais Timor-oan ne’ebé iha koñesementu kona-ba kestaun tasi Timor.

Problema ne’ebé komplikadu tanba relasiona ho soberanu nasaun nian, aumenta ho kestaun diplomasia la’os buat ida fasil atu hakotu iha tempu badak nia laran. Mesmu, povo Timor ho pozisaun firme katak, tempu ona atu ko’alia kona-ba fronteira maritima.

Mesmu lei internasionais hatete klaru kona-ba direitu total Timor-Leste ba tasi Timor, maibé Austrália uza stratejia hodi satan-án hosi norma legais ne’ebé nasaun sira ne’ebé riku minarai kumpri.

Entaun, ‘funu’ stratejia, diplomasia nomos negosiasaun ne’ebé agora dadaun trasa, presiza unidade ida forte hosi Timor-oan sira hotu, atu dala ida tan povo Timor bele hetan ninia soberania total, tantu ho fronteira rai maran, fronteira tasi no seluk tan.

Dadaun ne’e, estadu ida ne’e kontinua buka maneira oi-oin hodi hetan simpatia no apoiu hosi nasaun bo’ot sira seluk kona-ba prinsipiu defende direitu no asegura soberania TL. Ita Hein. (*)