PERIODE dala tolu ona, Parlamentu Nasionál halo violasaun ba direitu povo atu hatene no akompaña prosesu diskusaun Orsamentu Jéral Estadu iha espesialidade.
Legalmente, artigu 167 rejimentu PN ne’ebé ko’alia kona-ba diskusaun no votasaun ba espesialidade, alinea 2 hatete, debate espesialidade ba proposta lei no planu orsamentu estadu ninia hala’o iha plenária la’os komisaun eventual tanba rejimentu rasik nem temi.
Teorikamente, deputadu sira sempre utiliza lia-fuan hanesan reprejentante povo atu atrai simpatia, mais iha pratika kuaze atu lakon. Membru orgaun legislativa rona liu sira nian amigu partidu polítiku duke atu rona ema laiha lian sira.
Maibé, kuandu besik ona eleisaun, automatikamente hahalok arogansia no lakohi atu rona povo nia lian sei lakon.
Ezemplu mak agora dadaun akontese ba bankada parlamentar Partidu Demokratika. Depois la’o tinan rua nia laran, PD deside atu halo ‘divorsiu’ ho komisaun eventual ne’ebé aseita hosi partidu Congresu Nasionál Rekonstrusaun Timor, FERTILIN no Frente Mudansa.
Mesmu nune’e, deputadu sira aprova ona proposta OJE 2016 ho montante billiaun $1,562 inklui imprestimu sira iha jeneralidade ho votos maioria a favor.
Entretantu, ko’alia kona-ba komisaun eventual, deputadu sira ne’ebé la-partisipa presiza halo reflesaun ba ida-idak nia-án nudar reprejentante povo. Hanoin seluk, deputadu ne’ebé la-hola parte iha komisaun eventual seidauk iha kapasidade naton atu análisa orsamentu estadu.
Nune’e mos, kna’ar loloos atu halo diskusaun no debate ba kestaun povo lakon ninia sentidu. La’os ne’e de’it, hanorin polítiku nain sira iha parlamentu sai ‘baruk-ten’, lakohi buka meius atu kapasita-án iha área lei no orsamentu.
Realidade hatudu ona, dala-barak sempre akontese. Produsaun lei sira ne’ebé deputadu aprova, la-hatene ninia kontiudu. Signifika, so prenxe quorum nomos hit kartaun no halo deklarasaun polítika ne’ebé laiha ninia isin.
“Desde inisiu kedas diskusaun OJE 2016 ba jeneralidade, PD hola kedas pozisaun katak komisaun eventual labele, tanba forma komisaun eventual ne’e taka ba públiku, PD ninia hakarak loke ba públiku lori mai iha plenária, nune’e públiku bele akompaña diskusaun espesialidade”, deputadu PD Virgilio Hornay ba jornalista sira iha PN, Sesta, (4/12).
Asaun ne’e hanesan stratejia no rekolla dadaun bala musan polítika atu hetan simpatia iha eleisaun jéral 2017. Aleinde ne’e, karik dadaun ne’e, PD la-tama ona lista atu hetan ‘asinatura’ ou partidu ne’e hetan ona ‘retornu’ naton atu infrenta festa demokrasia. Prosesu atu la’o oinsá, importante liu mak polítiku sira tenki hatudu ezemplu di’ak para povo banatin. Ita Hein. (*)
Tidak ada komentar:
Posting Komentar