RDTL Ne’e Demokrasia

RDTL Ne’e Demokrasia

Konstituisaun Repúblika Demokrátika Timor-Leste iha artigu 1 ne’ebé ko’alia kona-ba (Repúblika) hatete, RDTL katak Estadu ida ne’ebé demokrátiku, soberanu, ukun-án no unitáriu, harii hosi povu nia vontade no iha respeitu bá dignidade ema moris ida-idak ninian. Artigu ne’ebé ko’alia kona-ba demokrasia parte hosi prinsipiu fundamental sira iha lei inan.

Entretantu, artigu 42 (liberdade atu halibur no halo manifestasaun) alinea 1) ba rai-nain hot-hotu fó garantia liberdade ba reuniaun pasifika ne’ebe laiha kro’at sei la-presiza autorizasaun uluk. Alinea 2) rekoñese ema hot-hotu nia direitu ba manifestasaun, tuir lei haruka.

Lei inan mak hanesan mata-dalan ba sidadaun hotu, tantu ukun nain sira nomos povo bai-bain. Maibé, dala-barak lider partidu polítiku sira bainhira ukun, implementa polítika ses hosi konstituisaun hatete e a’at liu mak satan no salva-án ho produsaun dekretu lei sira.

Tanba ne’e, asaun manifestasaun ne’ebé halo hosi estudante Movimentu Universitariu Timor-Leste hanesan parte ida hosi kontrolu sosial tanba RDTL ne’e Repúblika Demokratika.

Loos duni, demokrasia la-rezolve problema hotu. Maibé, keta haluha katak, só demokrasia mak dalan ida atu fó hanoin malu entre polítiku nain sira ho sosiedade, li-liu povo sira ne’ebé laiha lian.

Sé kuandu laiha demokrasia, karik ukun nain sira sei haburas buat ida abuzu poder, mal administrasaun, mal jestaun, korupsaun, kolusaun, nepotismu, violasaun ba lei sira, violasaun ba direitus umanus nomos sei taka tilun ba preokupasaun povo.

Demokrasia buat ida importante tanba hanesan meius ida atu fó hanoin ba malu. “Sé demokrásia bele rezolve problema hotu-hotu, sei laiha problema finanseiru iha rai bar-barak, rai barak iha dividas maka’as tanba rai barak hakarak planta demokrásia ho funu, ohin loron ita haree ema halai hosi Mediu Oriente lor-loron ba Europeia”, eis Primeiru Ministru, Kay Rala Xanana Gusmão hatete iha Ainaro, Sabadu, (24/10).

Saida mak akontese iha rai seluk nudar referensia ba Timor-Leste atu halo notas hodi reflete. Katak, demokrasia ne’ebé RDTL opta la’os atu hamosu konflitu, maibé hadi’a esperensia ne’ebé liu ona iha 2006. Nune’e mos, hadi’a povo nia moris, liu-hosi programa polítika sira ne’ebé polítiku sira promete iha tempu kampaña jéral.

Importante duni atu Timor-oan hotu fó valor ba sakrifisiu ne’ebé eroi sira rai hela. Atu hatutan hirak ne’e mak partisipa ativu iha prosesu dezenvolvimentu nasionál.

Atu hametin partisipasaun povo iha prosesu dezenvolvimentu nasionál, ukun nain sira labele kria fali injustisa sosial nomos diskriminasaun iha sosiedade ninia le’et.

Kuandu, laiha polítika di’ak hosi ukun nain sira, dalan ne’ebé presiza utiliza mak demokrasia. Tanba ne’e, utilizasaun demokrasia ba duni interese ema barak nian, la’os interese grupu. (*)