Kazu Emilia ho Hanjam Nudar Ezemplu

HAHÚ semana ne’e, públiku kontinua akompaña prosesu julgamentu ba kazu eis ministra finansas, Emilia Pires ho eis vise ministra saúde, Madalena Hanjam, ne’ebé hala’o iha tribunál munisipiu Dili ho akuzasaun partisipasaun ekonómika no administrasaun danoza.

 

Durante julgamentu semana ida nia laran, tribunál kontinua rona sasin sira mak hanesan eis ministru saúde, Nelson Martins, eis direitóra Hospital Nasionál Guido Valadares (HNGV) Odete Viegas, no mós ofisiál sira iha ministériu saúde hanesan finansas, ordem pagamentu no tékniku aprovizionamentu ministériu saúde.

 

Maioria hosi sasin ne’e deklara, laiha koñesementu di’ak ba prosesu sosa kama ba HNGV. Satán, montante orsamentu ne’ebé gasta. Entaun bele konsidera, deklarasaun sira ne’e hamosu tristeza ho realidade sira ne’ebé akontese ba instituisaun Estadu sira.

 

Tanba, ofisiál sira iha ministériu saúde laiha ‘seriedade’ atu mantein profesionalismu hodi halo verifikasaun ba dokumentu sira ne’ebé tama, liu-liu kona-ba projetu sosa kama.

 

“Momentu ne’ebé ha’u ladun kompriende ho sistema foun ne’ebé estebelese iha ministériu saúde, liu-liu iha diresaun finansas. Tan ne’e dala-ruma ha’u sala deklara iha audensia ne’e”, sasin ida rekoñese durante deklarasaun iha tribunál.

 

Agora, deklarasaun ida ne’e fanun instituisaun Estadu sira, liu-liu sira ne’ebé assume responsabilidade hodi lidera instituisaun Estadu para eskolla rekursu umanu ne’ebé ho kapasidade di’ak atu halo servisu tuir regra e tuir lei ne’ebé vigora.

 

Aliende ne’e, kazu Emilia Pires, Madalena Hanjam, Lúcia Lobato no mós Ruben Braz hanesan sasukat ida ba governante atuál sira atu kontinua kumpri regra no mós lei sira.

 

Regra no lei nu’udar mata-dalan ba ukun nain sira no mós ofisiál sira ne’ebé loron ba loron haree kestaun osan tenki domina didiak prosesu legál.

 

Kestaun partisipasaun ekonómika, administrasaun danoza, abuzu ba podér nu’udar problema prinsipál ne’ebé durante ne’e ukun nain sira la-halo separasaun didiak hodi hadok hosi krime sira ne’e.

 

Tempu ona, situasaun sira ne’ebé liu ona hanesan ezemplu ida hodi halo ba notas. Liu-liu ukun nain sira no lider partidu polítiku sira atu halo exame konsénsia para reflete situasaun atual povu no Nasaun. Só ida ne’e de’it mak bele hametin moral di’ak atu ukun.

 

Realidade hatudu hela, maioria povu sira ne’ebé hela iha área rurál kontinua enfrenta problema infrastrutura bázika sira. Sira ne’ebé vulneravel kontinua lakon direitu hodi asesu ba estrada di’ak, lakon direitu ba bee mos, kualidade sira iha sentru saúde no mós eskola sira kontinua hasoru problema fasilidade no rekursu umanu.

 

Governante sira tenki hametin espíritu nasionalismu no patriotismu atu ukun di’ak. Ita Hein. (*)