Riku soi mina no gas nudar reseita numeru um ba Repúblika Demokratika de Timor-Leste (RDTL). Kada tinan, governu ne’ebé ukun foti osan mina hodi halo prosesu dezenvolvimentu nasionál. Ho ukun-án durante tinan 16, ukun nain sira seidauk produs reseita ruma hodi troka mina no gas ba futuru.
Dependensia ba mina no gas, halo jerasaun sira agora laran taridu. Taridu tanba hanoin oinsá jerasaun sira tuir mai (oan no bei-oan) bele sente moris di’ak, sé kuandu loron ruma reseita ne’e sei laiha e aumenta tan tusan ne’ebé hanesan akontese ba nasaun sira seluk.
Kestaun mina nudar problema ne’ebé sensitivu tebes. Esperensia hatudu, nasaun sira ne’ebé riku ho mina, dadaun ne’e moris susar tebes tanba ukun nain sira haree de’it ba ninia interese. Hosi faktus sira ne’e mak halo jerasaun agora, li-liu sosiedade sivil sira ne’ebé haree ba kestaun mina, taridu.
Mina sempre konvida ‘konflitu’. Dadaun ne’e, Timor-Leste infrenta konflitu ho ninia amigu ne’ebé nudar nasaun viziñu. Tanba ne’e, ukun nain sira ne’ebé agora foti desizaun polítika tenki matenek, matan moris no neon nain atu haree ba interese nasaun no povo nomos interese bilateral, nune’e relasaun ne’ebé durante ne’e la’o, labele mosu sinal la-di’ak.
Hosi kestaun ne’e, matenek nain ba lei maritime, Vaughan Lowe sujere ba estadu Timor-Leste atu kuidadu ho Austrália bainhira halo negosiasaun kona-ba frontreira tasi.
“Delimitasaun frontreira marítima ne’e komplikadu, tanba liña klaran (median line), dala barak halo negosiasaun la-susesu. Maibé, justisa mak sei haree saida mak loos, saida mak sala. Tanbasá mak ita la-dezeña marka liña klaran ba frontreira marítima iha mundu tomak, ita tenki halo negosiasaun ho kuidadu”, Lowe ko’alia kestaun ne’e nudar oradór iha semináriu ida kona-ba lei tasi nian iha edifísiu Liceu Universidade Nasionál Timor-Leste (UNTL), Kinta, (10/9).
Ho rekoñesementu Lowe katak Timor-Leste laiha koñesementu kle’an kona-ba lei tasi nian nudar dezafiu ba estadu ne’e.
“Timor-Leste bele laiha peritus, laiha koñesementu, maibé ita tenki emprega ka fó servisu ba ema ida hodi hala’o servisu, estadu tenki uza asessor ne’ebé di’ak hodi define stratéjiku kona-ba ita nia direitu kona-ba fronteira marítima, tanba buat hot-hotu tenki la’o justisa”, peritu ne’e fó hanoin ba estadu TL.
Sujestaun ida ne’e presiza hetan konsiderasaun hosi ukun nain sira. Estadu ida ne’e mos tenki matenek halo selesaun ba peritu sira iha area maritima, nune’e defende duni interese nasaun no povo.
Situasaun ne’ebé agora dadaun Timor-Leste infrenta hafanun Timor-oan tomak atu hametin unidade. Unidade ne’ebé durante Timor-oan sira uza ba prosesu luta ukun rasik-án nian. Ita Hein. (*)
Tidak ada komentar:
Posting Komentar