Eis Komandante Servisu Investigasaun Kriminál, Polísia Nasionál Timor-Leste (PNTL), Calisto Gonzaga, simu ona pena tinan ualu fulan neen hosi Tribunál Munisipiu Díli, Sesta, (25/9) tanba prova komete krime partisipasaun ekonomika no sekuestru.
Tuir akuzasaun ministériu públiku, arguidu kontra lei kodigu penal Timor-Leste nian iha artigu 160 kona-ba sekuestru no artigu 299 sobre partisipasaun ekonómika.
Artigu 160 hatete 1) sé mak, iha situasaun ne’ebé la-tama iha lei prosesuál penál nia previzaun, detein, prende, mantein iha prizaun ka detensaun ema seluk ka, oin naran ida, hasai ema ida nia liberdade sei hetan pena prizaun to’o tinan tolu ka multa.
Entretantu esplikasaun ba parte 2) sei aplika pena prizaun tinan 2 t’oo tinan 8 kuandu: a) privasaun ba liberdade ne’e kle’ur liu oras 72; b) ajente pratika privasaun ne’e ho ofensa ba integridade fízika, tortura ka tratamentu seluk kruél, degradante ka ezumanu; c) privasaun ne’e halo vítima mate, tanba ajente nia neglijénsia, ka halo vítima oho-án; d) ajente halo privasaun ne’e ba ema ne’ebé ezerse autoridade públika, relijioza ka polítika; e) autoridade nia ajente ka organizasaun polítika nia membru mak promove, autoriza ka apoia privasaun ne’e.
Nune’e mos artigu 299 1) funsionáriu ne’ebé intervein iha kontratu ka operasaun ka aktividade seluk, tanba kargu públiku ne’ebé nia ka’er, no aproveita kondisaun ne’e atu hetan ba nia ka ba ema-seluk, diretamente ka hodi ema-seluk, vantajen patrimoniál ka, oin naran ida, partisipasaun ekonómika ilísita, no, nune’e, hamosu prejuizu ba interese públiku ne’ebé nia tenki administra, fiskaliza, defende ka realiza, sei hetan pena prizaun tinan 2 to’o tinan 8.
Parte 2) kuandu konduta ne’e hamosu ba estadu prejuizu a’as-liu dolar Amerikanu 10.000 sei aplika pena prizaun tinan 3 to’o tinan 15.
Ho faktus sira ne’e, tribunál liu-hosi juiz prezidenti José Maria ba kazu Calisto hasai ona sertidaun estraia hodi husu ba ministériu públiku para halo investigasaun hasoru sasin atual ministru planeamentu no investimentu, Xanana Gusmão, ministru interior, Longuinhos Monteiro, no ministru defesa, Cirilo Cristovão.
Desizaun ne’e hanesan sasukat ida ba orgaun judisiariu atu hatudu ninia soberania hodi hametin prosesu justisa iha Repúblika Demokratika de Timor-Leste (RDTL).
Sé kuandu prosesu investigasaun ne’e la’o ho di’ak no laiha satan hosi parte polítiku ruma, bele akontese sasin nain tolu ne’e indireitamente kona artigu sekuestru.
Tempu ona atu hametin duni estadu de direitu demokratiku. So dalan ida ne’e de’it mak bele hametin soberania nasaun RDTL.
Hirak ne’e atu akontese, Xanana Gusmão, Longuinhos Monteiro no Cirilio Cristovão mak tenki hahú hatudu ezemplu ho provas, ema hotu hanesan iha lei nia oin. Ita Hein. (*)
Tidak ada komentar:
Posting Komentar