Koñese Borja da Costa?

Lian neneik, bisu-bisu no dala-ruma forte hodi halo afirmasaun ba lia-fuan ruma. Lia-fuan mesak simplis maibé hamoris signifikadu ne’ebé kle’an. Nia mak Francisco Borja da Costa.

Fatuberliu oan ne’ebé moris iha loron 14 fulan-Outubru 1946 ‘lekar’ hela memoria no ispiritu luta ba ukun rasik-án. 

Liu-hosi puizia mesak murak, hatudu ninia espresaun hodi inspira joven sira atu firme kontra kolonial iha Timor-Leste.

Kontribuisaun Poeta Borja da Costa bo’ot tebes ba dezenvolvimentu kultura nasionál hanesan mos lider Frente Revolusionariu Timor-Leste Independente (FRETILIN) sira seluk.

Nudar fundadór FRETILIN, Borja buka matenek iha Soibada no Seminariu Dare, maibé husik tiha iha 1964 hodi servisu ba governu kolonial.

Aliende servisu ba instituisaun estadu kolonial, Borja mos hala’o servisu militár iha Laklubar hahú 1968 to’o 1971. Ho esperensia ne’ebé aumenta, Borja barani hato’o ninia kritika hasoru diskriminasaun rasial no ativa partisipa iha rede klandistina anti kolonial ne’ebé mosu durante 1970.

Ho matenek sira ne’e, administrasaun kolonial haruka Borja halo estajiu iha Jornal Diariu de Notisia iha Lisboa-Portugal durante Setembru 1973.

Oportunidade estajiu ne’e, Borja utiliza hodi partisipa ativamente iha diskusaun polítika ho Timor-oan ne’ebé radikal hanesan António Carvarinho Maulear, Vicente Reis Sahe, Roque Rodrigues Maubenko, Hamis Bassarewan Hatta no Abílio Araújo ne’ebé iha ligasaun metin ho movimentu eskerda sira iha Portugal.

Durante kolonial, Português sira konsidera Timor-oan hanesan ema ne’ebé la-matenek. Atu infrenta situasaun ne’e, Revolução dos Cravos ne’ebé akontese iha Portugal hanesan oportunidade ida.

Entaun, influénsia hosi matenek nain sira hanesan Bertolt Brecht, Pablo Neruda, Maxim Gorky, Mao Tse Tung, artigu Marxista ninian no Agostinho Neto, Jorge Rebelo, Samora Machel no Amilcar Cabral, Francisco Borja hamutuk ho maluk FRETILIN sira seluk dezenvolve kultura nasionál ho nia baze mak kultura lokal hodi orienta ba libertasaun.

Kolaborasaun entre Borja da Costa ho Abílio Araújo mak halo muzika ho ninia tittlu Foho Ramelau no Kdadalak hosi dadolin tradisionál ho ideia nasionalista hodi ko’alia kona-ba sentimentu povu. 

Muzika ne’e popular tebes iha partidu FRETILIN. Kontribuisaun ne’e haree hosi integra letra tradisionál ho ideia nasionálista.

Etniku firaku no kaladi ne’ebé kolonial promove hetan atensaun hosi Francisco Borja da Costa. Tanba ne’e, poezia ne’ebé hakerek hanesan Foho Ramelau sempre ko’alia lokal ba jerál, partikular ba universal no suku ba nasaun: Loke matan loro foun to’o iha ó knuak, Loke matan loro foun iha ita rain.

Saudozu konsiente hosi aspeitu kultura, Timor-Leste nu’udar nasaun unidade nasionál mais aspetu nasionál seidauk eziste tanba etniku ka reinu iha liurai sira nia ukun ho hanoin rasik katak, Timor-Leste nu’udar nasaun la-eziste.

Maibé, múzika Francisco Borja da Costa no Abilio Araújo nu’udar sinal importante kesi Timor-Leste hanesan nasaun. 

Mesmu, la-konsege sente ukun-án tanba Francisco Borja da Costa hetan oho hosi militár Indonézia iha loron 7 fulan-Dezembru 1975 bainhira nasaun viziñu komesa invade Timor-Leste.

Atu hanoin hikas ispiritu libertasaun kultura, Palku Arte Popular sei hala’o atividade kultural iha Asosiasaun HAK, Farol, loron 14 fulan-Outobru 2015, hosi tuku 18.30 to’o remata. 

Individu no grupu arte kultural ne’ebé sei partisipa hodi toka no kanta, tebe, lee poezia no teatru mak Ego Lemos, Abe Barreto, Nelson Truquel, Agostinho Moniz, Almerindo, Otopsi, SIN, Lia Rai Nain, Bulak, Bulak no Foer Kreativu, Sebastião Avan, Sandra Tilman, Trolta Havana no banda sira seluk. (rita almeida/fontes ki HAK)