FOIN dahuluk akontese iha Repúblika Demokratika de Timor-Leste (RDTL) liu-hosi Klibur Instituto Ensino Superior Privadu-Timor Leste (KIESP-TL) komemora loron mundial ba profesór sira.
Promotór ba selebrasaun ne’e mak Reitór Universidade da Paz, Lucas da Costa ne’ebé hamahan-án iha KIESP-TL. Oinsá ho estadu ida ne’e ninia valorizasaun ba hanorin nain sira iha nasaun RDTL ida ne’e, hahú hosi eskola infantil to’o ensinu superior públiku? Li-liu hanorin nain sira ne’ebé infrenta hela problema oi-oin iha area remotas.
Ukun nain sira tenki tau iha hanoin katak, susesu hosi ema ida nian la-ses hosi papel importante profesór sira. Agora ukun nain sira ne’ebé agora dadaun ukun, valoriza ona hanorin nain sira ka-la’e?
Karik seidauk. Realidade ne’ebé profesór sira infrenta, li-liu eskola primaria to’o eskola sekundaria kontinu infrenta problema oi-oin, hahú hosi salariu to’o oportunidade ba kapasitasaun atu hakle’an koñesementu siensia.
Salariu nudar problema prinsipal ne’ebé estadu ne’e tenki toma atensaun. Bainhira hanorin nain sira la-hetan atensaun sobre asuntu ne’e, konserteza afeita mos ba kualidade iha atividade aprendizajen.
Sé kuandu ida ne’e mak akontese ba tempu ne’ebé naruk, oinsá nasaun ida ne’e bele hetan kualidade rekursu humanus hodi prenxe prosesu dezenvolvimentu nasionál.
Entretantu, kualidade rekursu humanos la’os de’it responsabilidade estadu. Maibé, importante liu mak dedikasaun hanorin nain sira tenki hatudu iha pratika mak oinsá transfere edukasaun ba alunu sira liu-hosi siensia no karakter. Aleinde edukadór, profesór sira mos tenki sai belun ba alunu sira.
Liu-hosi dedikasaun, neneik-neneik estadu ne’e sei dignifika valór ne’ebé profesór sira oferese ba nasaun ne’e liu-hosi hasa’e koñesementu rekursu humanus jerasaun ba nasaun.
“Ha’u sente ho premiu ne’e bele motiva liu-tan atu hadi’a kualidade hanorin”, Júlio Ximenes Madeira nudar hanorin nain ida hosi suku Coliati Leotelo ne’ebé hanorin iha eskola primaria Hatolia, postu administrativu Hatolia, munisipiu Ermera.
Hanorin nain ne’e simu premiu ho naran Maha Chakri Sirindorm Award hosi liurai Thailandia nia oan feto Prizensa Thailandia, Maha Chakri Sirindom.
Júlio Ximenes Madeira nudar inspiradór ba hanorin nain sira seluk atu hadomi duni ninia kna’ar hanesan edukadór. Entretantu, Maha Chakri sai ezemplu ba ukun nain iha RDTL ne’e atu valoriza ninia emar sira hanesan saida mak Thailandia halo, la’os liu-hosi deklarasaun polítika sira, importante mak asaun. Parabens ba professor sira. (*)
Tidak ada komentar:
Posting Komentar