TMR Harii Partidu?

FESTA demokrásia ne’ebé sei akontese 2017 konta de’it fulan. Ho tempu ne’ebé badak, partidu sira tantu partidu tuan no foun komesa halo preparasaun hodi infrenta situasaun ne’e. Sira ne’ebé nanis ona komesa hakbesik no 'hamaus' militante ho atividade halo reestruturasaun partidu iha baze hodi hasoru ‘kompetisaun’ demokrásia.

Entretantu sira ne’ebé foun, komesa tama sai uma, dere arame ba malu, hasoru malu hemu kafé no fuma sigaru, halo promesa sira, buka simpatia nomos apoiu para prenxe kritéria 20 mill nune’e bele rejistu partidu iha tribunál rekursu.

Mesmu sei tinan ida, maibé sira ne’ebé atu harii partidu, konsidera la’ós tempu ne’ebé naruk hodi servisu maka’as para atinje objetivu. Satan, foin liu-hosi dalan rekolla eleitóres 20 mill hodi harii partidu legál ida.

TANBA Nasaun ne’e ho naran Repúblika Demokrátika Timor-Leste (RDTL), sidadaun hotu iha ninia direitu ne’ebé hanesan tuir konstituisaun haruka.

Lei inan RDTL artigu 46 ne’ebé ko’alia kona-ba partisipasaun polítika iha alinea 1) rai-nain hot-hotu iha direitu atu partisipa, hosi nia rasik eh liu-hosi reprezentante ne’ebe hili ona tuir demokrásia, ba vida polítika no ba asuntu públiku nian iha rai laran. Alinea 2) rai-nain hot-hotu iha direitu atu halo no partisipa iha partidu polítiku sira. Alinea 3) konstituisaun no organizasaun ba partidu polítiku sira lei mak sei regula.

Ho garantia ida ne’e, hosi Jaco to’o Enklave Oekusi, hosi tasi feto to’o tasi mane, komesa lansa debate públiku ho asuntu figura atuál Prezidenti Repúblika, Taur Matan Ruak (TMR), atu harii partidu ho naran Partidu Liberta Povu (PLP).

Interesante. Liga ho vizita sira ne’ebé durante ne’e la’o ba munisípiu sira no área rurál sira, hafanun funu nain Taur Matan Ruak, tanba rona resin preokupasaun sira ne’ebé durante ne’e povu hato’o. Ho papel Xefe Estadu ne’ebé labele halo buat barak, entaun hanoin harii partidu nu'udar dalan di’ak para hatan ba susar sira ne’ebé durante ne’e haree rasik ho matan.

Mehi liberta povo ne’e bele absoluta? Pergunta ida ne’ebé sai dezafiu ida. Hakat ba kotuk ho prejensa CNRT (Conselho Nacional Reconstrução Timor) nu'udar alternativa ida seidauk konsege hametin soberania Estadu. Triste liu, prejensa CNRT ho aliansa, koligasaun to’o konsensus polítika ho FRETILIN, kontinua husik hela ‘duvidas’ lubun balun iha povu nia le’et.

Mehi liberta povu no lori povu hodi partisipa ativa iha prosesu dezenvolvimentu nasionál, la’ós buat ida ne’ebé fasil. Maibé, la’ós mós buat ida ne’ebé difísíl. Prosesu luta ba ukun-án nu'udar referénsia ba ukun nain sira no TMR nu'udar nain ba referénsia ne’e.

Mais referénsia luta naruk ne’e bele tuir situasaun atuál ida agora ka-la’e? TMR bele la’o hosi aldeia ida ba aldeia ida seluk no TMR bele kesi kabun no fahe paun sorin ba ninia povu sira. Mas, sira ne’ebé tuir TMR bele halo hanesan ne’e ka-la’e? Ita Hein. (*)