Ekipa selesaun nasionál nain hitu ne’ebé hetan naturalizasaun hodi partisipa iha kompetisaun kualifikasaun kopa mundial Rusia 2018 no Kopa Azia 2019 entre Timor-Leste ho Palestina no Timor-Leste ho Malazia, kontinua mosu preokupasaun hosi públiku, li-liu parte sosiedade sivil.
Kestaun ne’e mosu bainhira naturalizasaun ne’e la-konsege salva Timor-Leste hosi kompetisaun futebol ho rezultadu 1:1 bainhira TL kontra Palestina. Nune’e mos, kuandu hasoru Malazia, Timor tenki loke sapeio ba Malazia tanba lakon ho 1:0.
La’os ne’e de’it, to’o agora ekipa selesaun nasionál ne’ebé kontinua prenxe hosi naturalizasaun seidauk konsege hamorin Timor-Leste ninia naran iha kompetisaun internasionál sira. Entaun, kontinua aumenta duvidas iha públiku nia le’et kona-ba ezistensia no hamate ispiritu joven Timor-oan sira seluk iha area futebol.
Ho situasaun ne’e, Segunda, (19/10) Primeiru Ministru, Rui Maria de Araújo, halo inspesaun ba Diresaun Nasionál Rejistu Notariadu ne’ebé tutela ba Ministériu Justisa. Liu-hosi vizita urjente ne’e, Xefi Governu fó orientasaun ba Inspetór Jéral hodi halo investigasaun ba naturalizasaun nain hitu.
Momentu ne’e, Direitóra DNRN, Maria do Rosario Fátima Castro, rekoñese jogadores naturalizasaun nain hitu ne’ebé agora dadaun tama iha ekipa selesaun nasionál moris duni iha nasaun Brazil.
“Ita haree mós ba dokumentus komprovativu hosi sira nia inan, aman inklui avô Timor-oan. Bainhira sira mai adopta fali sidadaun Timorense, sira iha direitu”, Maria Castro halo esklaresementu bainhira Primeiru Ministru halo inspesaun.
Deklarasaun sira ne’e presiza duni atu halo investigasaun ho hanoin ida la’os atu kondena Federasaun Futebol Timor-Leste (FFTL) ne’ebé lidera hosi Francisco Kalbuadi Lay ou governu liu-hosi ministériu justisa, espesialmente DNRN.
Maibé, ho hanoin ida hadi’a nomos enkoraja foin sa’e Timor-oan sira ne’ebé talentu di’ak iha futeból maske durante ne’e la-konsege hetan atensaun ou oportunidade atu hamorin nasaun ne’e nia naran ba eventu internasionáis sira.
Importante hosi investigasaun ne’ebé sei halo hosi IJE la’os atu reforsa deklarasaun sira hosi FFTL katak, naturalizasaun akontese tanba de’it interese estadu hodi halakon buat ida derota golu hosi nasaun avansadu sira iha area futeból.
Loos duni katak, tuir lei numeru 9/2002 ne’ebé ko’alia kona-ba nasionalidade iha artigu 8 (nacionalidade originária) nomos artigo 13 (naturalização por altos e relevantes serviços) karik fó dalan ba naturalizasaun ekipa selesaun nasionál.
Agora, sinal atu halo investigasaun hosi IJE, sai sasukat ba FFTL nomos estadu ida ne’e hodi komprova legalidade hosi naturalizasaun ekipa selesaun nasionál. Tanba dadaun ne’e, Palestina halo protesta ofisial ba FIFA hodi halo investigasaun ba Timor-Leste ninia jogadór ne’ebé nakonu ho naturalizasaun. Ita Hein. (*)
Tidak ada komentar:
Posting Komentar