Tinan ida ne’e ninia rohan, 28 Novembru fulan-oin, estadu Repúblika Demokratika de Timor-Leste (RDTL) sei komemora festa bo’ot rua mak hanesan, selebrasaun tinan 500 Portugués tama Timor nomos proklamasaun independensia unilateral ba dala 40.
Selebrasaun ba atividade rua ne’e sei konsentra iha Rejiaun Espesial Administrativu Oekusi (REAO). Dadaun ne’e, preparasaun halo iha fatin-fatin.
Preparasaun hahú hosi rehabilitasaun estrada sira hanesan hosi fronteira Sakato to’o ponte Lifau ho distansia kilometru 27. Estrada Samoro to’o Tono ho kilometru 20 liu, harii ponte Noefefan Lifau ho naruk metru 360. Nune’e mos, harii jardin, monumentu, otél luxu, rehabilita edifisiu sira, eletrisidade no bee mos, la’o namanas hela.
Hosi preparasaun sira ne’e, kompañia ne’ebé ka’er projetu otél nomos harii monumentu Lifau infrenta problema orsamentu. Mesmu nune’e, sira ‘kontinua’ halo servisu hodi finaliza kontratu ne’ebé asina ona.
Agora, projetu sira ne’ebé halo hodi prepara ba selebrasaun ne’e sai kestaun tanba tempu atu halo servisu nia durasaun mak fulan neen. Ho tempu ne’ebé badak, konserteza obra sira ne’e ninia kualidade tuir tempu ne’ebé determina.
Entretantu, grande projetu sira ne’ebé agora dadaun la’o ka’er hosi kompañia hanesan Waskita Karya, Utama Karya, Adi Karya, Yun Zi hosi Korea, Power Plan hosi Wartsila, Timor Capital Partners Asia, Yizen Chen, Yun Zin no ADB (Asia Development Bank).
Haree ba profil kompañia sira ne’ebé ka’er projetu, konserteza rezultadu sei hatudu rezultadu di’ak. Importante mak polítika atu halakon burokrasia labele ko’alia de’it, maibé tenki hatudu iha ninia pratika.
Agora, tarjetu atu remata iha fulan-Novembru hodi atende festa ne’ebé trasa ona, bele akontese ka-la’e. Sé kuandu, la-konsege akontese ho pursentu 100, autoridade kompetente iha REAO nomos nasionál, dadaun ne’e buka alternativa atu hatan ba situasaun iha momentu selebrasaun.
Entretantu, alternativa ne’ebé atu mosu, importante mak halo kontente bainaka sira ne’ebé estadu ne’e konvida atu asiste selebrasaun ne’e. Nune’e mos, estadu ne’e tenki hanoin no haree mos ba partisipasaun povo e partisipasaun povo importante duni atu hatudu ba bainaka sira.
“La’o tarde duni, mais ita buka hela para aselera, oinsá mak konstrusaun ne’e bele hotu hodi responde ba seremonia 500 anos”, Direitór Ajensia Dezenvolvimentu, Samuel Marçal, ba diariu ne’e iha ninia servisu fatin, Sesta, (2/10).
Situasaun ne’ebé agora dadaun la’o iha REAO, ho esperansa kontinua la’o tuir koridór legal, nune’e hatudu ba públiku ninia satisfasaun no orgullu ba polítika kriasaun ZEEMS (Zona Exlusivu Ekonomia Merkadu Sosial). Ita Hein. (*)
Tidak ada komentar:
Posting Komentar