“Ita hanoin nafatin sira, ita lembra nafatin sira, ita sei buka nafatin sira nia restus mortais ba sira hotu ne’ebé seidauk hetan, maibé ita buka ho orgullu, sentimentu kontente, tanba sira nia sakrifisiu mak ohin ita iha nasaun independente ida”, Primeiru Ministru, Rui Maria de Araújo hatete iha Palasiu Governu, Sesta, (4/9/2015) bainhira lansa loron deslutu nasionál.
DURANTE periode deslutu nasionál ne’ebé la’o, sentimentu kontenti no orgullu ida oinsá mak akontese ba estadu ida ne’e, li-liu povo sira ne’ebé to’o agora kontinua moris susar iha area rurais.
Promesa seluk ne’ebé realiza mak familia balun rekolla ona sira nian mate ruin ho apoiu hosi governu liu-hosi ministériu solidaridade no sosial. Entaun, todan balun komesa kasu dadaun. Mais todan seluk hodi kontribui iha prosesu dezenvolvimentu nasionál kontinua sai servisu uma nian ba polítiku nain sira.
Entretantu, ko’alia kona-ba deslutu nasionál, sa objetivu mak atu atinji hosi programa ne’e. Orgullu ida oinsá mak ukun nain sira atu hanorin ninia povo. Tanba, buat ida orgullu ne’e automatikamente metin ona iha povo ida-idak ninia hanoin atu banati.
Agora, orgullu ne’e seidauk akontese iha ukun nain sira. Realidade hatudu, ukun nain sira kontinua ukun, hanoin de’it ba interese grupu no partidaria. Dala-barak ‘haluhan’ tiha interese komun.
“Maluk sira ne’ebé mak sei iha hela prosesu buka halot restus mortais, hosi ita nia asuwain sira ne’ebé mate ba rai ida ne’e. Tanba ne’e, liu-hosi diskusaun ida iha nivel governu, ami hanoin no Ministériu Administrasaun Estatal ne’ebé simu kna’ar hanesan Komisaun Organizadora hanoin, fó tempu tan lai para prosesu ne’e dada lai, ita hein diskusaun no desizaun hosi governu mak ita bele formaliza buat ne’e”, Ministru Estadu Koordenador Assuntu Administrativu no Ministru Administrasaun Estatal, Dionisio Babo informa ba jornalista sira iha Palasiu Governu, Segunda (28/12).
Tuir loloos momentu importante ida hanesan agora ne’e, governu liu-hosi ministériu solidaridade no sosial toma ona atensaun ba restu mortais sira ne’ebé kontinua rai iha ossoariu jardim herois Metinaru Dili.
Tanba, planu ne’ebé governu trasa atu halot iha tinan ne’e ba selebrasaun loron importante sira hanesan restaurasaun independênsia, independênsia nomos invasaun Indonezia, mais atu tama tinan foun, restus mortais kontinua seidauk halot.
Planu hanaruk deslutu nasionál, reflesaun saida mak ukun nain sira halo ona ba estadu ne’e. Orsamentu Jéral Estadu ne’ebé kada tinan aumenta, mais benefisiu ba povo mais minimu. Impotante mak halo buat di’ak ruma ba povo ne’e, nune’e rezultadu ukun-án ida ne’e la’os ba ukun nain sira de’it mais povo mos bele sente. Ita Hein. (*)
Tidak ada komentar:
Posting Komentar