Kualidade rekursu umanus atu prenxe prosesu dezenvolvimentu nasionál ninia hun mak mai hosi hanorin nain sira. Sé kuandu, professor sira mak ninia kualidade nivel edukasaun mínimu, oinsá mak bele atinji kualidade rekursu umanus ba futuru.
Atu haree ba kestaun ida ne’e, papel estadu liu-hosi ministériu edukasaun importante atu toma atensaun. Abut kualidade edukasaun tenki mai hosi professor sira, tantu hahú hosi eskola infantil to’o eskola superior (públiku ou privadu).
Direitór Jéral Kooperativus Ministériu Edukasaun (ME) informa, profesóres kontratadu lubun balun la-prenxe kriteria iha nivel edukasaun lisensiatura, diploma 3, no D2.
“Ami buka mekanismu oinsá atu halo koperasaun ho UNTL (Universidade Nasionál Timor-Leste) atu kapasita ka fó formasaun ba profesores kontratadu sira ne’ebé mak seidauk prenxe kriteria ne’e, nune’e tinan rua, tolu oin mai ne’e, sira bele prenxe ona kriteria hanesan lisensiatura ka D3”, Antoninho Pires informa ba jornalista sira iha Vilaverde, Segunda, (16/11).
Situasaun ne’e labele atu akontese tan ba tinan lima no 10 oin mai. Tanba, atu haforte kualidade edukasaun ne’ebé kabe ba prosesu dezenvolvimentu nasionál, presiza rekursu umanus ne’ebé ho kualidade naton atu kontribui.
Saida mak akontese sai notas importante ba estadu ida ne’e liu-hosi ministériu edukasaun atu fó duni prioridade ba hanorin nain sira atu aumenta sira nian kapasidade iha nivel edukasaun.
Governu liu-hosi ministériu edukasaun tenki tau importansia ba eskola públiku sira. Eskola públiku tenki sai prioridade numeru um hodi ema ida-idak eskolla ninia prioridade atu aumenta koñesementu siensia.
Mais realidade ne’ebé akontese, eskola públiku ba de’it povo kbi’it la’ek sira nian oan hodi hetan oportunidade eskola. Entretantu, ema sira ne’ebé iha osan buka liu eskola privadu ne’ebé ho kualidade duke eskola públiku.
Tuir loloos situasaun sira ne’e labele akontese. Tanba, tinan-tinan estadu ida ne’e fakar osan, mais area edukasaun kontinua infrenta problema.
Tempu ona, estadu ida ne’e liu-hosi governu atu toma atensaun seriu ba area edukasaun. So, liu-hosi edukasaun, li-liu rekursu umanus hanesan profesores mak bele atinji kualidade rekursu umanus ba nasaun ne’e ninia futuru.
Estadu labele taka matan ho prejensa kualidade eskola privadu sira, tanba maioria povo kontinua moris susar, entaun difikulta oportunidade atu asesu ba eskola ne’ebé ho kualidade. Entaun, eskola públiku nudar alternativa hodi fó oportunidade ba povo kbi’it la’ek ida. Ita Hein. (*)
Tidak ada komentar:
Posting Komentar