Judisiariu Ninia Forsa

Prosesu dada ‘borraxa’ hodi prosesa eis ministra finansas, Emilia Pires, no eis vise ministra saúde, Madalena Hanjam, konsege tama ona ba episode dahuluk hodi hakle’an lia-loos kona-ba prosesu fornesementu kama ba Hospital Nasionál Guido Valadares.

Hirak ne’e hotu, dala ida tan, orgaun soberanu judisiariu hatudu ninia forsa hodi halo julgamentu ba ema importante nain rua ne’ebé tempu uluk jere osan povo no nasaun, nomos halo desizaun polítika ba prosesu hametin boa governasaun.

Emilia Pires no Madalena Hanjam durante loron tolu, hahú Segunda, (5/10) to’o Kuarta, (7/10) tur iha kadeira manas tribunál munisipiu Dili nudar arguida hodi rona no sei hatan ba akuzasaun ministériu públiku.

Arguida nain rua, ministériu públiku akuza tanba diskunfia komete krime hodi fó direitu ba kompañia MAC’S METALCRAFT pty Lda, hosi Austrália hodi fornese kama ortopédika ba HNGV. Madalena Hanjam hetan akuzasaun tanba HNGV nudar ninia responsabilidade polítika e momentu ne’eba assume kna’ar nudar vise ministra saúde.

Entretantu, Emilia Pires diskunfia komete konflik interese tanba nain ba kompañia ne’ebé manan tender hodi fornese kama, nudar ninia laen kaben. Ho situasaun sira ne’e ministériu públiku akuza arguida nain rua ho artigu kodigu prosesu penal 274 ho 299.

Artigu 274 ne’ebé ko’alia kona-ba administrasaun danoza parte 1) ema ne’ebé, kuandu iha obrigasaun atu fó-destinu ka administra ema-seluk nia interese, servisu ka bem patrimoniál, maski nia mós sosiedade ka pesoa koletiva ne’ebé soi interese, servisu ka bem sira-ne’e nia sósiu, hamosu prejuizu patrimoniál signifikativu ekonomikamente tanba nia viola intensionalmente regra kona-ba kontrole ka jestaun ka aktua ho violasaun grave ba devér kona-ba nia funsaun, sei hetan pena prizaun tinan 1 to’o 4.

Parte 2) bem, interese ka servisu referidu iha númeru anterior estadu, pesoa koletiva ho utilidade públika, kooperativa ka asosiasaun populár nian karik, ajente sei hetan pena prizaun tinan 2 to’o 6. Parte 3) pena sira-ne’e sei aplika mós ba ema ne’ebé halo ninian ka husik ema-seluk halo ninian, ilejitimamente, koiza ne’ebé nia bele fó-destinu tuir de'it finalidade ne’ebé ema ne’ebé administra ema-seluk nia patrimóniu tenki tuir.

Nune’e mos, artigu 299 partisipasaun ekonómika, parte 1) funsionáriu ne’ebé tenki intervein iha kontratu ka operasaun ka atividade seluk, tanba kargu públiku ne’ebé nia ka’er, no aproveita kondisaun ne’e atu hetan ba nia ka ba ema-seluk, diretamente ka hodi ema-seluk, vantajen patrimoniál ka, oin naran ida, partisipasaun ekonómika ilísita, no, nune’e, hamosu prejuizu ba interese públiku ne’ebé nia tenki administra, fiskaliza, defende ka realiza, sei hetan pena prizaun tinan 2 to’o 8.

Parte 2) kuandu konduta ne’e hamosu ba estadu prejuizu a’as-liu dolar Amerikanu 10.000 sei aplika pena prizaun tinan 3 to’o tinan 15.

Ho akuzasaun sira ne’e, espera orgaun judisiariu kontinua mantein ‘forsa’ atu husu arguida sira nian responsabilidade ba aktu ne’ebé komete. Ita Hein. (*)