VETA Orsamentu Jéral Estadu (OJE) 2016 ou lei saida de’it ne’ebé governu ka Parlamentu Nasionál haruka ba Prezidenti Repúblika nudar direitu perogativu Xefi Estadu nian tuir konstituisaun RDTL artigu 88.
Tuir esplikasaun artigu refere iha alinea 1, prazu loron 30 nia laran, hahu hosi simo diploma nara-naran ida hosi PN atu promulga hanesan lei, Prezidente Repúblika bele promulga ou uza direitu veto nian, atu husu apresiasaun foun ida, iha mensajen fundamentada; alinea 2) sé karik PN, iha prazu loron 90 nia laran, konfirma voto tuir maioria absoluta deputadu sira nian, ne’ebe servisu hela, PR sei promulga diploma ida ne’e, iha prazu loron 8 nia laran, hahú hosi loron ne’ebé nia simu.
Nune’e mos iha alinea 3) sei presiza, maioria dois tersus deputadu sira ne’ebé presente, no tenki liu maioria absoluta deputadu sira ne’ebe servisu hela, atu konfirma diplomas ne’ebé iha matéria sira hakerek iha artigu 95. Alinea 4) prazu loron 40 nia laran sura hosi simu diploma nara-naran ida governu nian atu promulga, PR bele promulga ou uza ninian direitu veto, ne’ebé sei hakerek ba governu tuir sentidu veto nian.
Tanba ne’e, Prezidenti Repúblika Taur Matan Ruak la-viola konstituisaun kuandu veto proposta OJE 2016 ho montante tokon $1,562 ne’ebé Parlamentu Nasionál aprova ho unaminidade (laiha kontra).
Razaun, konsidera orsamentu ne’ebé governu aloka ba projetu sira hanesan mega projetu tasi mane nomos ZEESM laiha retornu efetivu ba povo. Nune’e mos, la-satisfeitu ba verbas ne’ebé aloka ba área saúde, edukasaun no agrikultura.
Prezidenti Taur Matan Ruak ba momentu ida agora salva duni konstituisaun nomos hametin demokrasia hodi promove transparansia no akuntabilidade tuir prespetiva komun e li-liu sosiedade sivil sira ne’ebé durante ne’e haree ba asuntu orsamentu no transparansia.
‘Estrañu’. Tanba, veta ne’e derepenti de’it. Kestaun ne’ebé mosu pro no kontra iha nasaun demokratika hanesan RDTL normal. Mais, perguntas mak tanbasá mak foin akontese ho konkordansia hamutuk hodi harii ZEESM nomos aprova projetu tasi mane.
Inisiu aprova mega projetu sira, presiza hatene katak, alokasaun orsamentu la’os ba tinan lima ka 10 maibé projetu bo’ot sira ninia orsamentu ne’e korenti no bele la’o durante tinan 20 liu. Entaun, mega projetu la’os tenki halo ba tinan ida no rua nia laran, mais presiza tempu ne’ebé naruk hodi halo investimentu.
Tanba ne’e, tinan foun polítiku nain sira presiza pratika polítika honestu, hodi halo edukasaun ba jerasaun foun sira, nune’e bele hametin integridade no kredibilidade nudar ema polítiku nain ba futuru. Espera, tinan ne’e bele lori duni naroman ba polítiku nain sira atu ukun ho interese povo no nasaun, la’os interese grupu no partidaria. Ita Hein. (*)
Tidak ada komentar:
Posting Komentar