MOMENTU hanesan kuandu governu ida ne’e liu-hosi Sekretariu Estadu Komunikasaun Sosial ho polítika ba kriasaun Konsellu Imprensa, Primeiru Ministru, Rui Maria de Araújo, ameasa lori jornal Timor Post ba tribunál.
Mesmu, konstituisaun Repúblika Demokratika Timor-Leste (RDTL) garante ho artigu 40 (liberdade espresaun no ba informasaun) alinea 1) rai-nain hot-hotu iha direitu ba liberdade espresaun no ba direitu atu hetan informasaun ruma, no tan informasaun loloos nian. Alinea 2) hala’o kna’ar kona-ba liberdade espresaun no informasaun ninian, labele fó limite hosi sensura ruma. Alinea 3) hala’o kna’ar ba direitu no liberdade nian ne’ebé hatete iha artigu ne’e, lei mak sei regula ho baze ba imperativu hodi fó respeitu bá lei inan no mos ema ida-idak nia dignidade.
Entretantu artigu 41 (liberdade imprensa no meius komunikasaun sosial ninian) alinea 1) iha garantia ba imprensa nia liberdade no meius seluk tan, kona-ba komunikasaun sosial. 2) liberdade imprensa komprende, hosi liberdade ba espresaun no hamoris/hakiak jornalistas, asesu fontes kona-ba informasaun, liberdade editorial, protesaun ba independensia no ba segredu profisionál no mos direitu atu halo jornal, publikasaun ninian no meius difuzaun selu-seluk tan. 3) labele permiti monopoliu kona-ba meios komunikasaun sosial. 4) Estadu hametin liberdade no independênsia ba orgaun públiku kona-ba komunikasaun sosial, hosi poder polítiku no poder ekonómiku.
Nune’e mos, alinea 5) Estadu hametin ezistensia ba servisu públiku ida ba radiu no televizaun, ne’ebé senti livre, haree mos ba objetivu seluk, hanesan protesaun no divulgasaun kona-ba kultura no tradisaun Repúblika Demokratika Timor Leste nian, no fó garantia ba espresaun opiniaun eh hanoin ema barak ninian.
Liga ho problema ne’ebé agora dadaun akontese entre Primeiru Ministru ho jornal diáriu Timor Post hamosu vantajen no des-vantajen hosi parte rua, depende ba ida-idak atu halo ninia interpretasaun. Mais importante hosi problema ne’e presiza halo reflesaun hodi tetu, mesmu kodigu penal ne’ebé RDTL ne’e opta halakon ona artigu defamasaun.
Akuzasaun bele akontese ho artigu 285 (denúnsia kalunioza) alinea 1) ema ne’ebé, ho meiu naran ida, iha autoridade nia oin ka publikamente, ho konsiénsia katak imputasaun ne’e falsu, denúnsia ka so’e suspeita katak ema ida halo krime ida, ho intensaun atu halo ema ne’e hasoru prosedimentu kriminál sei hetan pena prizaun to’o tinan tolu ka multa. 2) kuandu ajente halo imputasaun falsu kona-ba ilísitu kontra-ordenasionál ka disiplinár, pena sei hetan atenuasaun extraordinária. 3) kuandu funsionáriu ne’ebé iha obrigasaun atu hala'o prosedimentu kriminál mak promove dolozamente faktu deskritu iha númeru anteriór sira pena aplikavel nia limite mínimu no másimu sei agrava datoluk ida.
Haree ba parte sira ne’e, Primeiru Ministru tenki ‘kuidadu’ atu foti desizaun kontra Timor Post ba prosesu legal. Tanba, Timor Post kumpri ona kode étika nomos lei komunikasaun sosial hodi fó espasu ba resposta. Espera katak, ‘mehi a’at’ labele atu akontese hodi estraga relasaun Timor Post ho Primeiru Ministru. Problema hotu sempre iha ninia alternativa. Ita Hein. (*)
Tidak ada komentar:
Posting Komentar