Eleisaun jéral 2017 besik dadaun. Partidu polítiku sira komesa trasa planu no stratejia hodi buka simpatia hosi povo sira. Nune’e mos, partidu foun sira buka dadaun eleitores atu prenxe rekezitus hodi rejistu iha tribunál rekursu.
Entretantu, uma fukun parlamentu nasionál, Kuarta, (28/10) aprova proposta lei numeru 21/III hodi altera lei numeru 3/2004 kona-ba partidu polítiku ho votus a favor 44, kontra 0 no abstensaun 6.
Tuir lei antigu, partidu ida tenki ho asinantes 1500. Maibé mosu alterasaun hosi 1500 ba 20.000 nudar rekezitus ida ne’ebé partidu tenki prenxe bainhira rejistu iha tribunál rekursu.
Alterasaun seluk mak estadu sei la-selu subvensaun ba partídu polítiku antes kampaña eleitoral, maibé estadu liu-hosi govérnu fó subvensaun ba partidu polítiku depois eleisaun. Sinal di’ak ba Repúblika Demokrátika Timor-Leste (RDTL) nomos pasu ida atu poupa orsamentu estadu.
Esperensia 2012 hatudu ona ba ukun nain sira mak partidu sira moris hanesan ema loke kios iha merkadu. Laiha interese atu manan ka lakon iha eleisaun, laiha interese atu trasa planu programa nomos stratejia kampaña atu atrai eleitores. Maibé, objetivu partisipasaun mak bele hetan subvensaun hosi estadu ho razaun harame prosesu demokrasia iha rai laran.
“Subvensaun ba partídu polítiku bazeia ba rezultadu eleisaun ka rezultadu votu ne’ebé partídu polítiku ida-idak hetan rezultadu votu ne’e ami limita kedas katak kada votu nia valor atu hetan mak valor minimu $1 no valor masimu $10, maibé governu mak determina tuir nia regulamentu rasik”, Prezidenti Komisaun A, deputada Carmelita Moniz esplika ba jornalista sira iha Parlamentu Nasionál, Kuarta, (28/10).
Intensaun altera lei partidu polítiku nudar asaun pozitivu ba prosesu demokrasia iha RDTL ida ne’e. Aleinde ne’e, sai sasukat ba partidu bo’ot sira atu hatudu duni kualidade iha area sira ne’ebé kabe ba interese povo.
Polítika ne’e hanesan parte ida hanorin lider polítiku sira atu hatudu duni kapasidade finanseiru. Nune’e, bainhira ukun, hatudu duni kualidade ukun hodi servi povo no nasaun, la’os ‘kualidade’ irregularidade sira ne’ebé akontese ona.
Ho alterasaun lei ne’e, karik sei mosu partidu haat ka lima mak sei partisipa ativu iha prosesu eleisaun jéral 2017 ou karik sei mosu de’it partidu rua ka tolu.
Bainhira produs tan lei ida forte, karik futuru RDTL sei hanesan Estadus Unidos da Amerika ho partidu rua de’it.
Kuandu, RDTL mak hanesan EUA. Prosesu demokratizasaun iha eleisaun nomos demokrasia iha sosiedade nia le’et no parlamentu bele lakon? Ita Hein. (*)
Tidak ada komentar:
Posting Komentar