Editorial Ikus ba diariu Timor Post

Depois Lere, Agora Xanana

DEPOIS Prezidenti Repúblika halo ezonerasaun ba maijór jenerál FALINTIL-Forsa Defesa Timor-Leste, Lere Anan Timur, ho intensaun klarifika ho legalmente iha uma fukun Parlamentu Nasionál. Maibé, hamosu rezultadu mak ema balun sente ofendidu ba mensajen ne’ebé halo iha loron 25 fulan-fevereiru foin lalais ne’e.

Ho mensajen ne’e konvida reasaun oi-oin. Hahú ho bankada parlamentár Congresu Nasionál Rekonstrusaun Timor (CNRT) hodi konsidera mensajen Xefi Estadu la-refleta sentidu Estadu ne’ebé garante dame no hakmatek.

La’os de’it CNRT, liu-hosi plenária parlamentár, segunda, (29/2) bankada FRETILIN mos hato’o reasaun.

“Tuir ami nia vizaun koezaun polítika nu'udar fundamentu Estadu importante ba prosesu konstrusaun hametin Estadu, tanba esperénsia hatudu ona mai ita katak bainhira laiha koezaun polítika mak ema seluk bele uza hodi hafera ita nia koezaun hodi lori krize oi-oin hodi impata ita nia prosesu hametin Estadu hodi lori dezenvolvimentu nasionál”, deputadu Francisco Miranda Branco hosi bankada FRETILIN deklara iha plenária.

Entretantu, pesoál ne’ebé direitamente sente ‘ofendidu’, eis Prezidente Repúblika, eis Primeiru Ministru no atuál Ministru Planu Investimentu no Estratejiku (MPIE), Kay Rala Xanana Gusmão, hato’o mos reasaun.

“Medalla ne’e ba pesoál ne’ebé konsiderasaun Estadu nian ba pesoal ida, nia haree katak sé medalla ne’e orgaun prezidensias mak fó rekoñesementu ba papel individu ida nian, propriu orgaun ne’e mak hasai deklarasaun balun dereitamente ba pesoál ne’e no sente des-valoriza ba ninia-án, entaun la-presiza no la-merese ita halo teatru ho medalla ne’e ba pesoál ida, sé ita nia laran karik konsidera pesoál ne’e hanesan ema ne’ebé númeru ida ba luta, nusa mak ita tenke valoriza nia ho medalla ne’e, ne’ebé nia iha direitu tomak atu devolve”, deputadu bankada CNRT, Aderito Hugo da Costa, ba jornalista sira iha PN, segunda, (29/2).

Tempu kuaresma importante ba lider sira atu eduka fuan hodi halo karidade, jejún, no reza maka’as nu'udar sarani Katolika, hanesan mensajen ne’ebé Papa Francisco I hasai ba momentu ne’e. Pasiensia ba malu, perdua malu liu-hosi dalan diálogu ou maneira saida de’it mak dalan di’ak hodi hatudu ezemplu ba povu.

Tuir loos klarifikasaun ba ezonorasaun Lere remata ona iha uma fukun, maibé to’o ikus konvida lider karismatiku, Xanana Gusmão, devolve medalla Grande Colar da Ordem de Guerrilha ne’ebé simu iha tinan kotuk.

Agora mosu figura diplomata, José Manuel Ramos Horta, buka hela dalan oinsá lori sira ne’ebé funu atu hamutuk, buka hakotu des-intementu. 

Espera, José Ramos Horta bele nahe biti boot ba sira ne’ebé hamosu polemika. Tanba, haree ba mai, povu komesa baruk no kole ona ho polítika ne’ebé hatudu. (*)

Mensajen ka Oportunidade

“Proposta ne’ebé governu aprejenta mak rekondusaun. Ha’u la-konkorda ho rekondusaun. Ha’u esplika, karik iha rekondusaun, implikasaun primeiru mak koronel sira no jenerál Filomeno Paixão mos laiha promosaun, tanba kontinua nafatin iha sira nian fatin”, Prezidenti Repúblika, Taur Matan Ruak, iha ninia esplikasaun ba Parlamentu Nasionál, Kinta, (25/2).

Agora ita haree fali saida mak Maijór Jenerál Lere Anan hatete. “Estatutu forsa armada nian mak maijór jenerál iha mandatu ba tinan haat, maibé governu fó konfiansa nafatin, bele hanaruk dala ida tan”, Lere ba jornalista sira liu-hosi konferênsia imprensa ne’ebé hala’o iha kuartel jerál FALINTIL-FDTL Fatuhada, Kuarta, (24/2).

Liga ba deklarasaun sira ne’e, governu liu-hosi ministru defesa tenke halo esplikasaun legál ba públiku, nune’e ema hotu bele esklaresidu. Aleinde ne’e, solusaun ba polemika desizaun Prezidente Repúblika nu'udar Komandante Supremu Forsa Armada nian mak tribunál rekursu hodi estuda ninia konstitusionalidade.

Entretantu, Xefe Estadu bainhira halo mensajen iha uma fukun Parlamentu Nasionál nu'udar orgaun soberanu ida, hosi orgaun soberania tolu seluk, para esklarese ninia desizaun, hamosu deskontente hosi ninia ‘adversariu’ sira.

Kontra ataka halo kedas hosi bankada Congresu Nasionál Rekonstrusaun Timor (CNRT). “Bankada CNRT ezije formalidade no labele uza improvizaun polítika. Prezidenti da Repúblika uza espasu públiku hodi halo atakes no insultu pesoal sem fundamentu ba lider nain rua mak, maun bo’ot Kay Rala Xanana Gusmão nu’udar Prezidente partidu mais votadu, CNRT no Maun Mari Alkatiri nu’udar Sekretariu Jéral Partídu FRETILIN” deputadu Aderito Hugo da Costa komenta iha konferênsia imprensa ne’ebé halo iha bankada parlamentar CNRT, Kinta, (25/2).

Tuir loloos, nu'udar aman ba nasaun, PR la-devia atu utiliza ‘oportunidade’ halo ataka. Hanesan Xefe Estadu, devia hato’o mensajen ba nasaun tenke reflete ba dame no hakmatek. Maibé, kontrariu, tanba ema balun sente ofendidu no konsidera hanesan defamasaun.

Loos duni, prátika polítika susar atu ema deskobre. Hirak ne’e bele konsidera Taur Matan Ruak, Lere Anan Timur, Xanana Gusmão, Mari Alkatiri, Lu-Olo no Ramos Horta halo hela ‘lasu’ hodi hatudu ba nasaun seluk katak, mesmu sira hamosu diferénsia ideia ba superior sira iha forsa armada, maibé forsa sira kontinua mantein pozisaun hodi fó hakmatek ba povu sem mete ba polítika.

Tanba ne’e, jerasaun sira tenke hakmatek atu estuda deklarasaun polítika sira ne’e. Situasaun ne’e hanesan osan mean ba foin sa’e sira atu aprende di’ak liu-tan polítika hodi sai lideransa ba aban bainrua.

Mesmu nune’e, tempu ona atu lider sira, li-liu Taur Matan Ruak, Xanana Gusmão, Mari Alkatiri, Lu-Olo no seluk tan atu hatudu ‘kualidade’ polítika ba povu, la’os ho polítika ataka malu no utiliza oportunidade iha fatin ne’ebé la-merese. Ita Hein. (*)

PR iha PN

Sistema ne’ebé Repúblika Demokrátika Timor-Leste (RDTL) opta ho semi prezidensial ko’alia klaru ona iha konstituisaun. Katak, Prezidenti Repúblika, Parlamentu Nasionál, Governu no Tribunál, ida-idak ho ninia kompetênsia tuir lei inan haruka.

Saida mak ko’alia iha artigu 74 kona-ba definisaun, alinea 1) Prezidente Repúblika mak Xefi Estadu, símbulu no garantia independênsia nasionál no unidade estadu nian ho funsionamentu regular instituisaun demokrátika sira. Alinea 2) Prezidente Repúblika mak Komandante Supremu Forsas Armadas nian.

Liga ba baze legal sira ne’e, Xefi Estadu, Taur Matan Ruak, ho kompetênsia hanesan Komandante Supremu Forsas Armadas nian, foti desizaun hodi nomeia Brigadeiru Jenerál Filomeno Paixão ba Majór-Jenerál FALINTIL Forsa Defesa Timor-Leste (F-FDTL) no Majór-Jenerál Lere Anan Timur promove ba postu Onorífiku hanesan Tenente-Jenerál.

Desizaun ne’e halo polemíka iha públiku nia le’et no konvida reasaun deklarasaun polítika hosi uma fukun Parlamentu Nasionál to’o Palasiu Governu.

La’os ne’e de’it, prosesu ‘dada malu’ ba dalan legal mos akontese. Governu liu-hosi Ministru Defesa nudar nain ba proposta ne’ebé Prezidenti Repúblika ‘ignora’, lori desizaun ne’e ba Tribunál Rekursu atu oinsá jurista sira estuda konstitusionalidade ba Xefi Estadu ninia pontu de vista.

Prosesu ne’e haree ba mai hanesan sorte di’ak ba polítiku sira hodi rekolla ‘bala’, nune’e aproveita tempu konsolidasaun partidu no eleisaun jéral ne’ebé besik dadaun.

Kestaun seluk ne’ebé hamosu situasaun sira ne’e mak krize komunikasaun entre orgaun soberanu sira nomos inkapasidade hosi ema sira ne’ebé servisu iha palasiu prezidensial, palasiu governu, mesmu fulan-fulan simu salariu boot, maibé lakon responsabilidade boot ba asuntu sensitivu sira. Situasaun sira ne’e presiza halo avaliasaun ba servisu nain profesionál sira iha palasiu prezidensial no governu, atu labele akontese fali ba futuru.

Ho inkapasidade hirak ne’e hotu, Prezidenti Repúblika, Taur Matan Ruak, tenke hatan no esplika ninia desizaun ba reprejentante povu iha uma fukun Parlamentu Nasionál (PN), Kinta, (25/2) ohin, ho transmisaun direita hosi Radio Televisaun Timor-Leste.

Transmisaun ne’e sei konvida ema hotu nia atensaun hodi rona no haree direitamente razaun legal saida mak Xefi Estadu hanesan mos Komandante Supremu Forsas Armadas nian foti ba ninia desizaun.

Hadi’a komunikasaun nudar dalan importante ba orgaun soberanu sira hodi hametin prosesu demokrasia iha rai laran. Polítika sira labele utiliza situasaun ne’e hodi halo fahe malu. Maibé, tenki matenek atu haree situasaun atual ne’ebé akontese iha rai laran. Ita Hein. (*)

Kontra Governu Austrália La’os Povo

Movimentu Kontra Okupasaun Tasi Timor (MKOTT) ne’ebé kompostu hosi estudante universitariu sira, sosiedade sivil, lider polítiku, reprejentante povo no entidade hotu, Tersa, (23/2) ohin, sei realiza manifestasaun kontra governu Austrália iha embaixada nasaun Kanguru ne’ebé lokaliza iha Fatuhada, Komoro.

Durante asaun kontra governu Austrália, MKOTT sei aprejenta pontus prinsipal haat mak hanesan respeita soberania Repúblika Demokratika Timor-Leste (RDTL) hanesan nasaun sira seluk, husu ba nasaun viziñu ne’e atu fila fali ba mekanismu disputa fronteira maritima liu-hosi juridisaun tribunál internasionál.

Aliende ne’e, pontus seluk ne’ebé movimentu ne’e aprejenta mak husu Austrália atu halo negosiasaun ho vontade di’ak, labele ho interese. Nune’e mos, husu atu labele uza poder polítiku no ekonomia iha rejiaun ne’e atu na’ok nafatin Timor-oan sira nian riku soin.

”Ita hatene katak, ita la’os kontra povu Austrálianu, maibé ita kontra polítika governu Austrália nian ne’ebé mak nafatin no lakohi halo fronteira marítima ne’ebé justu mai ita no ita hatene katak, forsa iha ba MKOTT iha Dili ne’e mak ativista Austrálianu no rai seluk nian ne’ebé hela iha fatin seluk no halo asaun hanesan ita halo”, Portavoz MKOTT Juvinal Dias ba jornalista sira iha edifisiu La’o Hamutuk iha Bebora Dili.

Tempu ona, governu Timor-Leste halo ‘ezijensia’ ba governu Kanguru hodi ko’alia kona-ba tratadu Certain Maritime Arrangement in the Timor Sea (CMATS).

Entretantu, ko’alia asuntu petroliu, estadu ida ne’e, liu-hosi entidade oi-oin tenki matenek liu atu halo negosiasaun ida ne’ebé labele estraga estratejia polítika hodi manan Austrália.

La’os fasil atu muda governu Austrália nia hanoin hodi rona povo Timor-Leste. Maibé, difikuldade ida ne’e, labele atu satan ispiritu para hatutan fali luta foun hodi manan soberania total ba nasaun nian moris di’ak.

”Ita respeita teb-tebes soberania estadu Austrália ninian, ita husu sira mós respeita soberanu Timor-Leste ninian”, Aderito Hugo da Costa nudar Segundu Vise Prezidenti Parlamentu Nasionál ba jornalista sira iha PN, Segunda, (22/2).

Nasaun ne’ebé de’it, atu ki’ik ka bo’ot, obrigasaun atu respeita soberania rai seluk nian. Hanesan Austrália, presiza loke fuan hodi rona povo Timor ninia preokupasaun.

Agora, ukun nain sira, li-liu negosiadór Kay Rala Xanana Gusmão presiza hametin unidade ba dala ida tan hodi hasoru ‘inimigu’.

Nune’e mos, entidade hot-hotu, dala ida tan atu husik interese saida de’it ba kotuk atu ka’er liman hamutuk, buka apoiu solidaridade, tantu hosi Austrália rasik no rai seluk ne’ebé ho influensia atu muda viziñu ne’e ninia hanoin. Ita Hein. (*)

Únidu, Kontra Austrália

Repúblika Demokratika Timor-Leste (RDTL) ne’ebé restaura ninia independênsia iha loron 20 fulan-Fevereiru 2002 kontinua infrenta problema oi-oin. Hahú problema rai-laran hanesan infrastrutura bazika, saúde, edukasaun no seluk tan to’o kestaun externa.

Externa. RDTL ne’e tenki aten ‘barani’ hodi hasoru ninia viziñu sira hanesan Indonézia ho Austrália. Indonézia, bele dehan mosu ona naroman atu determina fronteira rai maran, tanba hela de’it pursentu rua.

Maibé, Timor-Leste kontinua hasoru satan lubun bo’ot ida ho Austrália ho Indonésia ba kestaun maritima.

Nasaun ne’ebé riku ba mina no gas, sempre infrenta problema oi-oin. Hosi korupsaun, debe to’o eksplorasaun illegal hosi nasaun ne’ebé iha ninia forsa.

Ezemplu, Timor ho Austrália. Hafoin, RDTL ne’e restaura independênsia iha 2002, Austrália nudar nasaun ne’ebé matenek ho esperensia no stratejia oin-oin, dada-án hosi prosesu internasionál atu rezolve problema maritima, United Nations Convention on the Law of the Sea (UNCLOS).

Pozisaun ida ne’e, automatikamente taka dalan ba Timor-Leste ho viziñu hosi Kanguru atu utiliza mekanismu internasionál hodi rezolve fronteira maritima.

Prosesu komplikadu no sensitivu ne’e, Konsellu Ministru iha loron Kuarta, (3/2/2016) nomeia Kay Rala Xanana Gusmão sai negosiadór prinsipal hodi halo negosiasaun ho Indonézia no Austrália kona-ba fronteira maritima.

Nomeasaun ne’e presiza hetan apoiu maka’as hosi entidade hotu. Tantu, povo, sosiedade sivil, igreja, to’o polítiku na’in sira. Signifika, unidade ne’ebé antes ne’e akontese durante tinan 24 nia laran hodi kontra okupasaun Indonézia, tenki akontese ou hamoris fali iha luta foun ida ne’e.

Só, unidade mak buat todan bele sente ninia kmaan. Tanba ne’e, polítiku nain sira labele utiliza momentu difisil ne’e hodi atinji objetivu ba ninia grupu partidaria. Interese grupu no partidaria tenki dudu ses ba kotuk, ho hanoin ida de’it mak oinsá Timor-Leste bele hetan fali ninia soberania total iha kestaun fronteira marítima.

Atu manan Austrália, karik la’os buat ne’ebé fasil e la’os mos buat ne’ebé difisil. La’os fasil tanba, presiza tempu, pasiensia no stratejia oin-oin atu hetan simpatia hosi nasaun seluk para apoiu luta povo nian.

La’os mos difisil, tanba esperensia luta durante tinan 24 nia laran, sai ona mata-dalan ba Timor-oan hotu, li-liu polítiku na’in sira ne’ebé nudar autór ba libertasaun povo kontinua eziste iha prosesu dezenvolvimentu nasionál ida ne’e. Tempu agora, atu hamutuk fila fali hodi hahú luta foun ida ne’e. Ita Hein. (*)

‘Kontradisaun’ PR ho Governu

“Prezidenti agora prontu responsabiliza, la-hasai fali, la-retira fali”, Prezidenti Repúblika, Taur Matan Ruak hatan, bainhira hala’o dialogu ho komunidade sira iha suku Fatubolu, Tersa, (16/2), relasiona ho ninia desizaun hodi nomeia Brigadeiru Jenerál Filomeno Paixão ba Majór-Jenerál FALINTIL Forsa Defesa Timor-Leste (F-FDTL) no Majór-Jenerál Lere Anan Timur ba postu Onorífiku hanesan Tenente-Jenerál.

Entretantu, parte governu liu-hosi Ministru Defesa, Cirilio Cristovão, hatete Primeiru Ministru, Rui Maria de Araújo, sei lori desizaun Xefi Estadu ba Tribunál Rekursu hodi husu inkonstitusionalidade.

Haree ba konstituisaun Repúblika Demokratika Timor-Leste (RDTL) artigu 86 (kompetênsia kona-ba orgaun seluk) parte m) katak, tuir proposta governu nian, Xefi Estadu Maior Jenerál Forsa Armada, Vise Xefi Estadu Maior Jenerál Forsa Armada no Xefi Estadu Maior Forsa Armada nian, rona tuir, iha kazu ikus mai ne’e, ba Xefi Estadu Maior Jenerál Forsa Armada nian.

Maibé, governu liu-hosi Primeiru Ministru deklara, desizaun ne’ebé Prezidenti Repúblika Taur Matan Ruak halo la-bazeia ba proposta governu.

“Agora se laiha ona dalan ba polemika governu ho Prezidente Repúblika ba nomeasaun Komandante Jéral foun Forsa Armadas nian, solusaun tenki liu-hosi dalan legal, nune’e Tribunál Rekursu halo apresiasaun ba desizaun Prezidente da Republika, ba distinu Maijór Lere Anan Timur inkonstitusionál ou la’e”, José Luis Sampaio nudar Diretór Ezekutivu Judisiariu System Monitoring Programe ba diáriu ne’e iha Kolmera, Tersa, (16/2).

Solusaun mak dalan legal. Tuir loloos, Prezidenti Repúblika presiza halo esplikasaun ofisial ba públiku hodi kabe ba razaun legal. Nune’e, povo sira bele informadu. Sé la’e, parte balun utiliza oportunidade hodi lansa propaganda, hodi kria instabilidade polítika entre orgaun soberanu hosi palasiu prezidensial, palasiu governu no parlamentu.

Loos duni katak, nasaun ne’e Repúblika Demokratika Timor-Leste. Pratika polítika ne’ebé agora dadaun mosu hodi hametin demokrasia iha rai-laran. Maibé, ukun nain sira mós tenki haree ba situasaun atual, povo ne’e maduru ona ka seidauk.

Atu prosesu demokratizasaun la’o di’ak, buat ida importante ba orgaun soberanu sira mak hadi’a komunikasaun.

Tanba, prosesu konsultasaun entre proposta governu ho pozisaun Prezidenti Repúblika liu-hosi karta ba governu la’o. Maibé, esplikasaun ofisial no legalmente ba públiku mak ki’ak tebes atu konvense hodi kumpriende prosesu ne’ebé la’o.

Saida mak liu dadaun, parte ida ‘fallansu’ meius komunikasaun entre palasiu prezidensial ho palasiu governu. Nune’e mos, mídia officer sira iha fatin ne’e, seidauk halo servisu ho didak atu fahe informasaun ba mídia komunikasaun sosial sira ho ofisialmente. Ita Hein. (*)

Governasaun Rui Araújo

Hafoin simu kna’ar foun nudar Primeiru Ministru iha Palasiu Nobre Lahane, loron 16 fulan-Fevereiru 2015 liu-ba, Rui Maria de Araújo iha ninia kumprimisiu mak kombate kultura burokratizasaun iha administrasaun públika no halo poupansa iha orsamentu estadu.

Durante tinan ida, ne’ebé kompleta ba loron ohin, Tersa, (16/2/2016) kontinua mosu kritika no lamentasaun hosi sosiedade sira. Hahú hosi atendementu públiku sira iha Hospital Nasionál Guido Valadares, Hospital Referal sira, sentru saúde sira, Diresaun Nasionál Transporte no Terrestre, Diresaun Nasionál Rejistu Notariadu no seluk tan, kontinua mosu des-kontenti iha públiku nia le’et.

Aleinde ne’e, prioridade sira hanesan saúde no edukasaun, públiku konsidera kontinua marka pasu. Infrastrutura sentru saúde, fasilidade sira hanesan atendementu ba pasiente no aimoruk kontinua sai problema ba povo kbi’it la’ek sira ne’ebé moris iha área remotas.

Nune’e mos edukasaun, estudante eskola públiku tantu hosi eskola infantil to’o universitariu kontinua infrenta fasilidade hanesan biblioteka, laboratorium no kualidade profesor sira iha lian Portugués.

Hirak ne’e hotu sai dezafiu ba governasaun Xefi Governu Rui Maria de Araújo hodi infrenta problema ne’ebé komplikadu e presiza solusiona iha tempu naruk.

Ko’alia kona-ba birokrasia la’os buat ne’ebé foun, satan Repúblika Demokratika Timor-Leste (RDTL) hanesan nasaun ne’ebé foin ukun-án.

“Ida ne’e kestaun ne’ebé presiza rezolve em-termus sistema, sistema sira ne’e seidauk iha fatin no buat sira ne’e hotu mós atraza servisu hirak ne’ebé ita hakarak atu muda”, Rui Maria de Araújo ba jornalista sira foin lalais ne’e iha Akanunu.

Atu hadi’a sistema, la’os buat ne’ebé fasil. Kore sistema ne’ebé haree ba la-di’ak, presiza kondisoens adekuadu atu muda. Ezemplu, kapasitasaun presiza halo anualmente. Funsionariu hot-hotu tenki hetan oportunidade ne’ebé hanesan, nune’e implementasaun servisu labele hanesan kalohan ne’ebé konvida udan.

Presiza mos tau atensaun ba funsionariu ninia moris di’ak, nune’e minimiza kestaun irregularidade, indisiplina e a’at liu mak subornu.

Hirak ne’e atu akontese, partidu hotu tenki halo kumprimisiu ba planu programa sira iha livru ou mata dalan ida ba tinan naruk nia. Nune’e, partidu ida mak ukun ou ukun koligasaun, labele atu muda fali mata dalan ne’ebé trasa ona. Maibé, banati tuir de’it hodi hadi’a saida mak sai preokupasaun komun.

Susesu ou seidauk susesu Rui Maria de Araújo ninia lideransa, konta dadaun jerasaun foun sira nian kapasidade iha lideransa. (*)

Re-jerasaun iha F-FDTL

Prosesu re-jerasaun iha vida polítika, hodi kumpri inkontru Maubisse I no II hatudu dadaun ninia rezultadu. Ezemplu dahuluk hatudu hosi Kay Rala Xanana Gusmão nudar eis Primeiru Ministru iha governasaun Bloku Koligasaun.

Hosi ida ne’e, akontese konsensus polítika iha uma fukun. Konsensus ne’e, partidu koligasaun ne’ebé ukun konvida opozisaun bankada parlamentar FRETILIN iha Parlamentu Nasionál hodi partisipa iha strutura governu ne’ebé lidera hosi Primeiru Ministru, Rui Maria de Araújo.

Hosi orgaun ezekutivu. Instituisaun estadu seluk hanesan FALINTIL-Forsa Defesa Timor-Leste (F-FDTL), semana ne’e simu informasaun foun katak, akontese mos re-jerasaun iha defesa ninia laran.

Situasaun ida ne’e, tanba Prezidenti Repúblika, Taur Matan Ruak ne’ebé antes ne’e lidera F-FDTL ezekuta konstituisaun Repúblika Demokratika Timor-Leste (RDTL) artigu 86 (kompetênsia kona-ba orgaun seluk) parte m) tuir proposta governu nian, Xefi Estadu Maior Jenerál Forsa Armada, Vise Xefi Estadu Maior Jenerál Forsa Armada no Xefi Estadu Maior Forsa Armada nian, rona tuir, iha kazu ikus mai ne’e, ba Xefi Estadu Maior Jenerál Forsa Armada nian.

Hatan ba proposta governu, Prezidente Repúblika PR Taur Matan Ruak nomeia Brigadeiru Jenerál Filomeno Paixão ba Majór Jenerál F-FDTL no Majór Jenerál Lere Anan Timur promove ba postu Onorífiku hanesan Tenente-Jenerál.

Desizaun ne’ebé mai hosi Xefi Estadu halo públiku hakfodak, tanba laiha sinal atu mosu mudansa iha momentu ne’e. Maibé, tempu ona atu mosu duni re-jerasaun lideransa iha instituisaun estadu hanesan F-FDTL.

“Ha’u dehan katak, prezidente aseita ka la-aseita, ha’u la-hatete katak ha’u aseita ka la-aseita, ne’e depende desizaun hosi governu ninian, purke ha’u servisu ba governu”, Maijór Jenerál Lere Anan Timur deklara ba jornalista sira iha Palasiu Prezidensial, Sesta, (12/2) hafoin inkontru ho Prezidenti Repúblika, Taur Matan Ruak.

Loos duni, servisu ba governu no estadu ida ne’e, aseita ka la-aseita, gosta ka la-gosta nudar sidadaun no lideransa ne’ebé ema hotu respeita tenki kumpri duni desizaun estadu. Hirak ne’e hatudu ba jerasaun foin sa’e sira atu banati tuir.

“Ami husu ba komunidade, ba ita nia jerasaun sira labele hanoin katak ami katuas sira ne’e ami fahe malu, laiha. Ami banati ba imi para imi la’o tuir, aban bainrua ami keta mate karik, imi mós hamutuk nafatin”, Lere hatutan ba jornalista sira.

Tanba ne’e, mensajen sira ne’e hanesan reflesaun ida ba jerasaun sira atu reflete katak, mudansa saida de’it sempre akontese. Fenomena hirak ne’e tenki duni atu mosu. Re-jerasaun ba nasaun tenki hahú agora, tanba moris ne’e la’os permanente, satan kargu. (*)

Reza, Karidade no Jejún

SARANI Katolik Roma iha mundu, Kuarta, (10/2) hahú tempu kuarezma hodi simu sinzas. Signifika, nudar Kristaun prepara-án no hatudu katak, nudar ema kriatura mai hosi rai, sei fila fali ba rai.

Hahú kuarezma tinan ne’e, Amu Papa Francisco I iha ninia mensajen ba sarani tomak katak, nudar sarani la’os de’it halo rekonsiliasaun ho Maromak, maibé nudar kriatura Nai nian, importante liu mak hatudu hahalok di’ak ba maluk sira seluk ne’ebé moris iha sala laran.

“Amu Papa husu atu ita rasik hatudu ba ita nia maluk sira ne’ebé moris iha sala laran katak, sira la-seluk la-le’et ida, maibé ita hotu mesak feto nian de’it, naan nian de’it, aman Maromak ninia oan”, Amu José Antonio da Costa hatutan iha ninia humilia bainhira selebra misa sinzas iha igreja Katedral Dili, Kuarta, (10/2).

Entretantu, hahú kuarezma ho Kuarta sinzas, tuir evangellu katak, Maromak hakarak ita ema hakbesik-án liu ba Maromak. Tanba, dala-ruma iha momentu bai-bain ita la-sente Nai ninia di’ak no tulun iha ita nia moris lor-loron nian.

Ho tempu kuarezma, ita presiza sente Nai ninia domin nomos perdaun ba ita nia hahalok. Ho ida ne’e, nudar sarani presiza hahú kuarezma tinan ne’e ho reza maka’as, halo karidade ba malu no jejún.

Jejún tuir Biblia, hadi’a ita nia hahalok hodi halo reflesaun. Katak, haree no sente Nai ninia prejensa iha ida-idak nian moris ba lor-loron nian. Objetivu, hanesan Biblia hatete, la’os hatudu-án ba ema seluk, maibé hakbesik-án liu ba Maromak ho laran klosok, hodi bele sente liu-tan Jesus nia terus, bainhira salva ema hosi sala.

Hahú kuarezma ho reza, karidade no jejún importante tebes ba ukun nain sira atu pratika iha kna’ar lor-loron nian hodi servi nasaun no povo.

Hosi reza, ukun nain sira bele hadok-án hosi hahalok ne’ebé la-favorese ba nasaun ida ne’e hanesan korupsaun, kolusaun, nepotismu, abuzu de poderes no seluk-seluk tan ne’ebé kontra lei no ukun fuan Maromak nian.

Karidade mais importante ba ukun nain sira nomos lider polítiku sira. Atu hatete, nudar ukun nain no lider polítiku labele karak demais ba ‘sasan’ ne’ebé ho interese komun hodi privatiza. Pratika polítiku ne’ebé interese ba ema barak (povo) duke interese pesoal, grupu no partidaria. Nune’e mos jejún, satan buat ne’ebé la’os prioridade. Li-liu la’os ba interese povo no nasaun, li-liu buat sira ne’ebé kontra lei.

Tempu kuarezma nudar momentu importante ba Timor-oan tomak, tantu sidadaun bai-bain to’o polítiku sira atu halo reflesaun ba ida-idak nia-án, oinsá atu kontribui ba prosesu dezenvolvimentu nasionál. 

Hanesan ema Katolika, momentu hanesan ne’e importante tebes atu hadok-án hosi sala no tentasaun oi-oin. Ita Hein. (*)

Estudante ‘Ilegal’

Maizumenus estudante Timor-oan 40 ne’ebé estuda iha Malang, Indonézia ameasadu sei hetan deportasaun hosi imigrasaun nasaun viziñu, tanba laiha dokumentus hanesan pasaporte no vistu liu ona prazu.

“Ha’u hatene estudante iha 40 resin mak Servisu Imigrasaun Indonézia ka’er no deporta sira fila mai Timor, maibé hetan deportasaun ka la’e ha’u seidauk hetan konfirmasaun, tanba ne’e mak ami sei halo konfirmasaun ho adidu edukasaun Timor nian iha Indonézia hodi konfirma loloos dadus ne’e, bainhira mak Imigrasaun Indonézia deporta estudante sira ne’e mai Timor”, Vise Ministru Edukasaun, Abel da Costa Ximenes, ba jornalista sira iha Ministériu Obras Públikas Transporte no Telekomunikasaun (MOPTK) Kaikoli, Kinta, (4/2).

AGORA, situasaun ne’ebé akontese, tantu embaixadór no adidu edukasaun presiza ho lalais atu halo konfirmasaun ba informasaun ne’ebé espalla. Nune’e, inan no aman estudante sira bele hetan ona serteza.

Mais to’o agora, atu la’o ba semana rua, ministériu edukasaun no ministériu negosiu estranjeiru no koperasaun seidauk simu informasaun hosi embaixadór nomos adidu edukasaun.

Loos duni katak, nasaun ida-idak ho ninia lei rasik atu aplika ba ninia sidadaun nomos ema estranjeiru sira ne’ebé kontra prosediamentu legal. Tanba ne’e, hanesan sidadaun Timor, estudante sira tenki hatene didiak regras legais sira, bainhira estuda iha rai liur.

Aleinde ne’e, atu labele infrenta problema sira, nudar estudante tenki kuda disiplina atu trata dokumentus sira, nune’e ho hakmatek atu remata estudu, hodi dezenvolve nasaun Timor-Leste.

Nune’e mos, embaixadór no adidu edukasaun sira asume papel importante atu halo lista ba númeru estudante sira, nune’e fasil atu kontrola no fó hanoin bainhira infrenta problema iha dokumentus.

Atu labele hamosu lia-fuan ilegal tanba kontra lei imigrasaun, estadu ida ne’e liu-hosi ministériu edukasaun no ministériu negosiu estranjeiru no koperasaun, hamutuk ho embaixadór nomós adidu edukasaun sira atu hadi’a mekanismu no sistema atendementu ba estudante sira, nune’e fasil atu halo tuir prosedementu ne’ebé estabelese.

Estudante sira hanesan futuru nasaun ne’e nian, tenki dignifika Timor-Leste iha rai liur hodi kumpri nasaun seluk ninia regras.

Hamorin nasaun ninia naran, parte ida kontribui ba dezenvolvimentu nasaun. Hosi ida ne’e mak ema hosi rai seluk komesa hakarak buka hatene kona-ba Timor-Leste.

Importante mos, ukun nain sira ne’ebé toma responsabilidade ba asuntu sira hanesan ne’e, tenki prevene atu problema hanesan akontese fali ba estudante no nasaun sira seluk ne’ebé Timor-oan sira buka matenek ba. Ita Hein. (*)

Krime, Falsifika Dokumentus

Falsifikasaun dokumentus nudar krime kontra estadu. Artigu 303, 304 no 305 kodiku penal Timor-Leste nian ne’ebé ko’alia kona-ba falsifikasaun ba dokumentus ka notasaun téknika hatete klaru katak, kuandu prova hatudu, halo duni falsifikasaun sei hetan komarka.

Artigu 303 esplika, ema ne’ebé, atu hamosu prejuizu ba ema-seluk ka ba estadu ka atu hetan benefísiu ilejítimu ba nia rasik ka ba ema-seluk, sei hetan pena prizaun to’o tinan tolu ka multa.

Nune’e mos, artigu 304 ne’ebé temi kona-ba falsifikasaun agravada, katak, kuandu faktu sira referidu iha artigu anterior kona-ba dokumentu auténtiku ka dokumentu ho forsa hanesan dokumentu auténtiku, testamentu serradu, valekorreiu, letra-kámbiu, xeke, dokumentu seluk-tan tansmisivel ho endosu ka notasaun téknika kona-ba veíkulu automovel, aeronave ka barku nia identifikasaun, totál ka parsiál, ajente sei hetan pena prizaun tinan rua to’o tinan neen.

Alinea 2 realsa, funsionáriu mak pratika faktu sira-ne’ebé hakerek iha artigu anteriór ka iha artigu 309, númeru 1, kuandu nia ka’er daudaun nia funsaun karik, sei aplika pena prizaun tinan rua to’o tinan ualu.

Aliende ne’e, artigu 305 ne’ebé ko’alia kona-ba dokumentu públiku nia falsifikasaun katak, funsionáriu ne’ebé, iha funsaun ne’ebé nia ka’er, atu hamosu prejuizu ba ema-seluk ka ba estadu ka atu hetan benefísiu ilejítimu ba nia ka ba ema-seluk sei hetan pena prizaun tinan rua to’o tinan neen.

Ho baze legal sira ne’e, funsionariu nain rua hosi Diresaun Nasionál Transporte no Terrestre (DNTT) ne’ebé hetan ka’er hosi Polísia Nasionál Timor-Leste (PNTL), liu-hosi Servisu Investigasaun Kriminál Nasionál (SIKN), ameasadu kuandu komprova komete krime.

Falsifikasaun dokumentus saida de’it, tantu karta kondusaun, sertidadaun RDTL, pasaporte ou dokumentus seluk ne’ebé liga ba proprietariu estadu, produsaun tenki ho legalmente. Signifika, ninia prosesu produsaun tenki liu-hosi dalan ne’ebé legal.

Tanba ne’e, funsionariu DNTT nain rua ne’ebé polísia kaptura, diskunfia halo falsifikasaun dokumentus hanesan karta kondisaun ba motorista sira, hanesan parte ida hosi funsionamentu atendementu públiku ne’ebé estadu ida ne’e halo ba povo.

Kestaun ne’e hanesan kail ida hodi deskobre irregularidade lubun balun ne’ebé durante ne’e kontinua falun iha instituisaun estadu sira seluk, tanba de’it superior sira laiha kapasidade naton atu kontrola no fó sanksaun.

Tempu ona, atu estadu ida ne’e, liu-hosi orgaun ezekutivu ne’ebé ezekuta orsamentu estadu atu toma responsabilidade masimu ba atendementu públiku sira. Tanba liu-hosi reseita ki’ik-oan sira bele tulun reseita estadu ne’ebé tinan-tinan kontinua hasai osan fundu minarai ne’ebé atualmente folin mina mos tun dadaun iha merkadu internasionál. Reseita domestika tenki hadi’a dadaun ona, la’os agora bainhira fali. Ita Hein. (*)

Entre FFTL ho LFA

LIGA Futeból Amadora (LFA) hanesan eventu desportiva ne’ebé durante fulan hirak nia laran harame ona kampu stadium munisipal Dili. Situasaun ne’e, kura netik adeptus no Amante futeból sira.

Tanba, durante tinan barak nia laran, depois Repúblika Demokratika Timor-Leste (RDTL) restaura ninia independênsia, Federasaun Futeból Timor-Leste (FFTL) ne’ebé lidera hosi Francisco Kalbuadi Lay ho ninia strutura sira, hanesan Amandio Sarmento la-konsege realiza eventu ida hanesan agora dadaun akontese.

“Ita nia Liga Amadora seidauk bele rejistu to’o iha Asian Football Confederation (AFC) nian, tanba ita la-tuir standar sira hosi Fédération Internationale de Football Association (FIFA) ninian”, Amandio ba jornalista sira hafoin enkontru ho Sekretariu Estadu Juventude no Desportu (SEJD) iha sede federasaun, Kinta, (28/1).

Loos duni katak, klubu futeból ida ne’ebé rejistu tenki prenxe rekezitu sira hanesan klubu tenki iha kampu futeból rasik no rekizitu sira seluk.

Hirak ne’e hotu, haree ba situasaun atual Timor, klubu sira seidauk bele duni atu prenxe kriteria sira ne’ebé organizasaun futeból professionál hatur hela.

“Ita seidauk bele rejistu Liga Amadora ba nivel a’as, tanba ita la-memenuhi standar kritériu sira ne’e”, Amandio tenik.

Mesmu nune’e, hakarak ka lakohi, gosta ka la-gosta, ego sira ne’ebé durante tinan barak nia laran metin, tenki naben ona atu dezenvolve desportu ba futuru.

Naksalak, irregularidade no falla sira ne’ebé durante ne’e akontese durante LFA la’o, hanesan sasukat ida atu hadi’a di’ak liu-tan ba tinan oin mai. Hirak ne’e hotu la’os hanesan bala atu hamonu malu.

Aliende ne’e, kestaun kontratu jogadór internasionál, li-liu nasaun viziñu Indonézia sai preokupasaun ba klubu balun.

Tanba ne’e, komisaun LFA presiza halo esplikasaun kona-ba regras sira ba públiku, li-liu adeptus ne’ebé durante ne’e akompaña eventu LFA. Ho esplikasaun ne’ebé kredibel de’it mak bele konvense adeptus no klubu sira nian preokupasaun.

Entretantu, klubu FC Carsae, Sport Laulara e Benfica, AS. Ponta Leste, Karketu Dili FC, DIT FC, FC. Aitana, FC Akademika, FC Portu Taibessi ne’ebé tama ba klasifikasaun finál LFA hanesan susesu hot-hotu nian. Tantu, adeptus, Amantes, governu liu-hosi SEJD, FFTL no strutura LFA. Jogu ne’ebé sei komesa fali loron 25 fulan-Fevereiru 2016 ho esperansa sei la’o di’ak liu iha faze apuramentu. Ita Hein. (*)

Futuru Akordu TL-RI

VIZITA Prezidenti Repúblika Indonézia, Joko Widodo, mai Timor-Leste (TL), Tersa, (26/1) konsege asina akordu iha área juventude no desportu, peska ilegal, meteorolojia no geofizika, rekursu minerais no sistema ba arkivu nasionál.

Repúblika Indonézia nudar viziñu ne’ebé besik liu. Haree ba aspetu ekonomia, sosial, polítika no kultura.

Akordu ne’ebé asina hanesan kestaun formal, hodi hametin servisu hamutuk ne’ebé durante ne’e la’o ona entre nasaun rua, liu-hosi ninia povo sira.

Ezemplu simplis mak desportu, jogadór hosi Indonézia nain tolu, dadaun ne’e harame ona Liga Futeból Amadora. Hirak ne’e hotu, inisiu hosi akordu ne’ebé estadu rua ne’e asina. Nune’e mos, peska ilegal, povo sira ne’ebé lor-loron moris iha tasi laran, sempre tulun malu.

Entretantu akordu sira ne’ebé antes ne’e asina, presiza haree fila fali. Li-liu edukasaun no saúde. Haree ba edukasaun, Timor-oan ho númeru ne’ebé bo’ot estuda iha Indonézia. Nune’e mos saúde, Timor-oan ne’ebé ho ekonomia ‘naton’, buka liu tratamentu iha Indonézia duke Austrália no Singapura.

Indonézia hanesan nasaun ne’ebé sai referensia ba Timor-oan sira hotu. Tantu hosi profisaun oi-oin. Nune’e mos, Timor-Leste bele sai referensia ba Indonézia.

“Ha’u hanoin buat ne’e di’ak. Kualker akordu, kuandu nasaun rua asina ne’e di’ak. Ida di’ak tanbasá, primeiru iha vontade atu servisu hamutuk, depois mak ita haree kontiudu. Importante mak nasaun rua ne’e halo servisu hamutuk. Segundu, klaru ke hosi akordu ne’e kestaun teknika ne’e depois mak ita haree halo nusa atu implementa”, Primeiru Vise Prezidenti Parlamentu Nasionál, Adriano do Nascimento ba jornalista sira iha PN, Kuarta, (27/1).

Aliende ne’e, deklarasaun Prezidenti RI Joko Widodo atu investe ho osan rupiah triliun hitu iha área infrastrutura, estadu ida ne’e, li-liu orgaun ezekutivu presiza halo konfirmasaun, atu hametin liu-tan liu-hosi akordu.

“Ha’u seidauk rona loloos Indonézia atu fó ida hanesan ne’e. Fó ho sevisu hamutuk ne’e la-hanesan. Ita halo sira manan tender, sira servisu nudar kompañia. BUMN (Badan Usaha Milik Negara) ou Emprensa Públiku, halo obra bar-barak, iha Oe-Cusse barak liu, sira ne’e hotu tama iha laran”, deputadu Adriano Nascimento subliña.

Sinal sira ne’ebé hatudu, nudar nasaun foun no nasaun maun-alin, ukun nain sira no Timor-oan hotu, presiza matan moris, neon nain atu aproveita oportunidade ne’ebé mosu.

Hosi oportunidade ne’ebé aproveita, signifika katak, prepara-án ba futuru, atu nune’e buat ida dependênsia ba área importante sira hanesan tekniku, Timor-oan sira iha tinan 10 ou 20 oin mai bele ka’er rasik ninia jestaun. Ita Hein. (*)

Bemvindo Jokowi

Repúblika Demokratika Timor-Leste (RDTL) preparadu atu simu ninia bainaka hosi nasaun viziñu Indonezia nian Xefi Estadu, Joko Widodo ho komitiva.

Durante vizita, sei ko’alia kona-ba asuntu polítika, ekonomia, defesa, seguransa, negosiasaun fronteira rai maran no tasi. Alende ne’e, nota intendementu ne’ebé governu aprova liu-hosi reuniaun extra-ordinariu Konsellu Ministru mak arkivu nasionál, agrikultura, enerjia no meterolojia.

Governu liu-hosi ministériu agrikultura no peskas, ministériu petroleu no rekursu naturais inklui ministériu obras públikas no komunikasaun mak sei reprejenta governu Timor hodi asina nota intendementu ho governu Indonezia. Vizita Prezidenti Repúblika Indonezia Jokowo nian mai Timor-Leste nudar vizita dahuluk.

Ho vizita dahuluk ne’e, atu hametin liu-tan relasaun bilateral ne’ebé durante ne’e estadu rai rua kria ona liu-hosi Xefi Estadu sira ne’ebé antes ne’e ukun. Razaun ne’e mak autoridade seguransa sira ho firme hametin seguransa ba bainaka sira.

“Sé mak halo asaun ruma PNTL iha para atu atua imidiatamente. Ami la-tolera tan sé de’it, ne’e para ita hatudu ba mundu ita mós bele asegura ita nia bainaka”, Komandante Jéral Polísia Nasionál Timor-Leste, Komisariu Júlio da Costa Hornay ba jornalista sira iha Kuartel Jéral PNTL Kaikoli, Segunda, (25/1).

Entretantu, vizita ne’e nudar momentu istóriku ba nasaun ne’e. Nune’e mos, hafanun povo ninia esperansa ba kestaun esensial sira ne’ebé durante pendente. Ezemplu mak ruin saudozo Primeiru Prezidenti RDTL, Nicolau Lobato.

“Agora ne’e ko’alia de’it kona–ba orientasaun polítika. Ita sei foka ba kestaun fronteira terrestre no fronteira marritima nian. Kona–ba mate ruin hotu–hotu, inklui saudozu Nicolau Lobato nian ne’e parte tekniku sira mak sei ko’alia”, Ministru Negosiu Estranjeiru no Koperasaun, Hernani Coelho ba jornalista sira hafoin partisipa reuniaun Konsellu Ministrus extra–ordinariu iha Palasiu Governu, Segunda, (25/1).

Mesmu nune’e, povo ne’e kontinua hametin ninia esperansa ba Prezidenti Repúblika, Taur Matan Ruak atu sita iha minutu balun ba asuntu refere.

Atu oinsá mos, asuntu ne’e importante atu ‘aselera’. La-signifika atu hanoin hikas hahalok a’at forsa Indonezia nian durante okupasaun. Maibé, nudar Timor-oan, li-liu familia Lobato, bele hanoin atu halo tuir kultura Timor nian.

Tanba, durante ne’e buat ida rekonsiliasaun sempre sai asuntu prinsipal atu dudu ses ezijensia justisa. Entaun, tanbasá mak atu husu tuir de’it ruin saudozo Nicolau Lobato no sira seluk sai debate ne’ebé sensitivu. Hakarak ka lakohi, loron ida povo ida ne’e bele simu no rona serteza kona-ba saudozo ninia paradeiru. Bemvindo Jokowi. (*)

Dignidade Feto

Feto forte, nasaun forte. Slogan ne’e mak ministériu saúde utiliza ba kampaña, atu oinsá kuidadu inan feto isin rua sira. Signifika, kuandu estadu ida ne’e tau atensaun didiak ba inan isin rua sira, konserteza futuru nasaun sira, sei moris mai ho isin di’ak no forte, hodi konta ba jerasaun nasaun nian.

Ko’alia kona-ba feto, ho mensajen ne’ebé inan ba nasaun Repúblika Demokratika Timor-Leste (RDTL) hato’o ba feto ran sira tenki tau dignidade a’as, importante tebes atu reflete.

“Alin feto sira tenki tau ita nia dignidade a’as liu buat hotu, labele monu ba manobra a’at sira hodi troka ho osan, ha’u hanoin katak futuru ida di’ak ba sira depende ba sira, hahú agora kuidadu sira nia-án para labele monu, rai-án didiak hanesan ema”, Primeira Dama, Isabel Ferreira ba jornalista sira iha Ministériu Edukasaun Vilaverde, Sesta, (22/1).

ATU hametin dignidade feto Timor, mensajen de’it sei la-hatun ninia númeru. Tanba ne’e, ko’alia kestaun feto ne’ebé liga ba dignidade. Igreja, familia no nasaun, ida-idak ho ninia papel ne’ebé importante.

Papel mais importante mai hosi familia. Tanba, hosi familia mak bele forma ema atu moris di’ak ou serve iha sosiedade nia le’et nomos oinsá kontribui ba dezenvolvimentu nasaun. Estadu ida ne’e mos labele taka matan atu halakon oportunidade ba feto sira.

Mesmu nune’e, keta mos haluha, dignidade no moral la’os buat ida tenki liu-hosi prosesu edukasaun, mais importante mak pratika iha hahalok.

“Ha’u enkontru ho joven feto sira ne’e, maibé sira informa mai ha’u katak, problema ekonomia nomos problema família la-tau atensaun ka akompañamentu joven feto sira ne’e. Tanba ne’e, sira monu ba tentasaun sira ne’e, ida ne’e sai preokupasaun ba ema hotu nian, ita mós nu’udar Timor preokupa”, Primeira Dama ko’alia.

Evolusaun ne’ebé agora dadaun akontese, RDTL hanesan nasaun foun presiza akompaña ho koidadu, antes foti desizaun ba kualker asuntu ruma. Nune’e, labele monu lalais ba lasu no tentasaun ruma.

Loos duni katak, feto ne’e fulneravel tebes, kuandu infrenta situasaun ne’ebé mais difisil. Hirak ne’e la-signifika, tenki sagrifika ninia dignidade ba buat sira ne’ebé la-di’ak iha sosiedade ninia le’et.

Mesmu nune’e, maioria feto Timor kontinua hametin kultura nudar ema ne’ebé ninia dignidade a’as. Agora ho prejensa globalizasaun iha área teknolojia, feto Timor tenki firme hodi komunga prinsipiu no doutrina nudar ema Timor. Ita Hein. (*)

Kestiona Vizita PR

Prezidenti Repúblika ninia kompetensia ne’ebé ko’alia iha konstituisaun Repúblika Demokratika Timor-Leste (RDTL) mak artigu 85 (kompetensia rasik), artigu 86 (kompetensia kona-ba orgaun seluk), artigu 87 (kompetensia relasaun internasionál) no artigu 88 (promulgasaun no veto).

Atu aumenta kna’ar hirak ne’e, Prezidenti Repúblika, Taur Matan Ruak, halo vizita ba teritoriu Timor laran tomak, hodi haree besik kondisaun atual ne’ebé povo infrenta durante prosesu nasaun ne’e ukun rasik-án. Aleinde ne’e, hametin relasaun entre povo ho ukun nain sira.

DURANTE vizita ho programa dialogu komunitáriu, preokupasaun ne’ebé Xefi Estadu sempre rona mak infrastrutura baziku sira hanesan bee mos, estrada, edukasaun, saúde. Nune’e mos, problema subsidiu ba veteranu sira, veteranu sira hadau malu projetu eletrisidade no kestaun sira seluk.

Aleinde rona no haree preokupasaun povo, Xefi Estadu hanesan mos eis gerilleiru hanoin hikas subar fatin no belun sira ne’ebé mak mate ona durante luta ba ukun rasik-án. Istória oi-oin momentu halo vizita refere. Hosi kontente, triste no hirus.

Hosi kontente kahur ho triste tanba haree fila fali no hanoin hikas memoria durante funu hasoru inimigu. Entretantu hirus, haree realidade atual, povo ne’e kontinua moris iha mukit nia laran, mesmu tinan ba tinan, uma fukun kontinua aprova osan, mais sira ne’ebé moris iha área rurais la-sente benefisiu hosi orsamentu ne’ebé governu ezekuta. Hirus ida, dahuluk povo Oekusi la-marka prejensa iha atividade ne’e.

Agora, oinsá atu solusiona preokupasaun ne’ebé povo hatutan. Ho sistema semi prezidensial, konserteza, Prezidenti Repúblika laiha poder iha jestaun orsamentu estadu. Kompetensia importante mak fó hanoin ba governu atu ezekuta orsamentu tuir povo ninia nesesidade. Aleinde ne’e, asaun seluk ne’ebé Prezidenti Repúblika halo foin lalais ne’e mak veta ba proposta orsamentu jerál Estadu 2016, mas ikus mai tenki promulga.

Hosi kompetensia sira ne’e hotu, ho vizita ba munísipiu sira hamosu duvidas iha públiku nia le’et. Ida-idak ho ninia persepsaun. Balun dehan buka apoiantes ba eleisaun jerál 2017. Balun fali dehan vizita ne’e la-importante tanba gasta de’it orsamentu Estadu.

“Sua exelénsia mai vizita ami hanesan ne’e gasta osan Estadu barak, tanba rombongan (ekipa) barak hanesan ne’e gasta osan barak”, José do Santos Laletek hanesan veteranus ida hato’o preokupasaun ne’e ba Xefi Estadu liu-hosi dialogu komunitaria iha suku Kotamutu, postu administrativu Luro, munísipiu Lautein, Tersa, (19/1).

Hametin komunikasaun entre ukun nain ho povo mak razaun ne’ebé Prezidenti Repúblika, Taur Matan Ruak, hatan ba preokupasaun ne’e durante diálogu.

Haree ba preokupasaun no razaun hirak ne’e bele konsidera, ida-idak ho ninia fundamentu. Mais benefisiu saida mak povo ne’e sente. (*)

Esperansa Lobato

SOFRIMENTU povo Timor-Leste durante invazaun Indonezia iha tinan 24 nia laran hamosu sofrimentu oi-oin. Barak mak lakon família hanesan inan, aman, maun, bin no alin to’o agora seidauk hetan ninia ruin.

Mesmu, Repúblika Demokratika Timor-Leste restaura ona ninia independênsia ne’ebé atu la’o ba tinan 13, família primeiru Prezidenti RDTL, Nicolau Lobato, kontinua tau esperansa ba estadu ida ne’e hodi halo ‘apresiasaun’ ba estadu Indonezia, atu oinsá hatudu Saudozo ninia ruin.

Saudozo nudar figura importante ba estadu ida ne’e, maibé estadu ida ne’e liu-hosi ukun nain sira kontinua la’o ‘hakdasak’ atu hetan serteza saudozo ninia ruin hosi nasaun viziñu Indonezia.

Ema importante de’it ninia prosesu la’o nei-neik, satan komandante bai-bain, soldadu nomos povo lubun bo’ot ne’ebé mate ba rai ida ne’e.

Agora, momentu importante deslutu nasionál ne’ebé seidauk remata, estadu ida ne’e liu-hosi ministériu kompetente presiza halo esforsu naton ho orsamentu jéral estadu 2016 ne’ebé Prezidenti Repúblika aprova ona bele fasilita.

“Ha’u seidauk rona no seidauk hatene katak atu mai trata kona-ba restus mortais Saudozo Nicolau dos Reis Lobato nian. Sé hosi vizita ne’e mak ko’alia nune’e duni, ha’u hanoin ne’e previleizu ida bo’ot teb-tebes, i partikularmente FRETILIN husik hela ninia rekoñesementu bo’ot ida ne’e fó apoiu para atu bele hatudu restus mortais saudozo Nicolao Lobato nian”, Prezidenti partidu FRETILIN, Francisco Guterres Lú-Olo hatete hafoin partisipa serimonia tomada posse ba Reitór Universidade Nasionál Timor-Leste (UNTL) iha Sentru Konvensaun Dili, Segunda, (18/1).

Entretantu, vizita Prezidenti Repúblika Indonezia, Joko Widodo, mai Timor-Leste iha loron 25 fulan ne’e nudar naroman ida ba ukun nain sira.

Aleinde koperasaun bilateral, estadu ida ne’e liu-hosi ninia diplomata sira tenki halo diskusaun kle’an kona-ba ruin sira ne’ebé to’o agora seidauk hetan, li-liu joven sira ne’ebé mate iha loron masakre Santa Cruz.

Família saudozo Nicolau Lobato no povo kontinua hein nutísia di’ak ho prejensa Prezidenti Jokowi mai Timor.

Ruin ne’ebé kontinua naklekar hodi sosa ukun rasik-án, la-siginifka haluha atu halot. Tanba ne’e, ho kultura Timor, servisu todan ne’ebé ukun nain sira presiza halo mak rekolla mate ruin sira ne’ebé to’o agora seidauk rekolla nomos lubun balun ne’ebé seidauk halot.

Vizita Jokowi bele hamosu esperansa ba nasaun no povo ne’e. Ita Hein. (*)

Kaptura ‘Imunidade’

Repúblika Demokratika Timor-Leste (RDTL) nudar nasaun foun ne’ebé ukun-án iha momentu, mundu ne’e akontese mudansa bo’ot iha área oi-oin. Hirak ne’e hotu nudar oportunidade osan mean ba Timor-oan sira atu akompaña no aprende.

APRENDE hodi sukat ba kondisaun real entre nasaun no povo. Mais saida mak akontese, referensia sira ne’e konsidera hanesan lixu, hodi finji halo matan a’at no tilun di’uk. Ukun nain sira ne’ebé agora dadaun ukun, dukur demais ho poder privizoriu, hodi dudu ses tiha buat ida integridade, kredibilidade nomos estadu de direitu.

A’at liu orgaun soberanu ne’ebé estadu ne’e kria hanesan Prezidenti Repúblika, Governu, Parlamentu Nasionál no Tribunál, ukun nain sira komesa lakon respeitu ba malu atu hametin estadu de direitu.

Ezemplu mak Tribunál, bainhira hala’o ninia kna’ar hodi halo forsa estadu de direitu, haruka karta ba uma fukun para hasai imunidade Prezidenti ba reprejentante povo Vicente Guterres no membru governu hanesan Isabel Ximenes atual Sekretariu Estadu Arte no Kultura, mais to’o agora kontinua pendente. Situasaun ne’e bele kria ‘des-intendementu’ ou halo fraku sistema ne’ebé monta ona.

“Ita hanoin katak ita persegi hela malu i estadu ida nunka bele hanesan ne’e i depois atu akuza hanesan segunda figura estadu hanesan Prezidente Parlamentu ne’e tenki iha razaun bo’ot teb-tebes i ka’er kedas ho liman”, Vicente Guterres, hatete ba jornalista sira iha Palasiu Prezidensial, hafoin hasoru malu ho Prezidenti Repúblika, Taur Matan Ruak, Kuarta, (13/1).

Haree ba deklarasaun ne’e, tuir loloos la-merese atu ko’alia, hanesan figura estadu ida ne’e. Nudar Prezidenti Parlamentu Nasionál, atu halo loos persepsaun oi-oin, ninia fatin mak tribunál, hosi tribunál mak bele kria ambiente buat ida loos no la-loos ne’e.

Realidade ne’e hatudu RDTL ne’e infrenta hela krize, oinsá ukun nain sira bele hatudu ezemplu ba ninia povo sira, hodi kumpri lei no ordem hanesan ko’alia ona iha konstituisaun katak, ema hotu iha lei nia oin hanesan.

Mais, saida mak akontese, lider ou ukun nain sira hafalun sira nia-án ho imunidade, hodi dada naruk prosesu sira ne’ebé ministériu públiku aprejenta ona ba tribunál. Entaun, numeru prosesu kazu ne’ebé durante ne’e pendente iha tribunál, indireitamente ukun nain sira mos kontribui.

Mesmu nune’e, prinsipiu igualidade katak, ema hotu hanesan iha lei nia oin. Tantu Prezidenti Repúblika, Primeiru Ministru, membru governu ou sé de’it mak assume kargu estadu, laiha ida mak tenki espesial, bainhira hasoru kestaun justisa. Tanba ne’e, tribunál ou ministériu públiku labele rende atu hapara esforsu ne’ebé la’o dadaun ona.

Agora, situasaun ne’ebé orgaun judisiariu sira infrenta, barani ka-la’e atu hasai mandadu kapturasaun ba sira ne’ebé kontinua falun-án ho imunidade. Ita Hein. (*)

Estadu ka Ego?

HAHÚ hosi reafirmasaun Parlamentu Nasionál ba Orsamentu Jéral Estadu (OJE) 2016 iha loron 8 fulan-Jeneiru foin lalais ne’e. Hakarak ka lakohi, semana ida ne’e nia laran, Prezidenti Repúblika, Taur Matan Ruak, tenki promulga OJE tinan ne’e nian.

‘Dever’ ne’e ko’alia ona iha lei inan Repúblika Demokratika Timor-Leste (RDTL) artigu 88 (promulgasaun no veto) alinea 2 hatete, sé karik Parlamentu Nasionál, iha prazu loron 90 nia laran, konfirma voto tuir maioria absoluta deputadu sira nian, ne’ebé servisu hela, Prezidente Repúblika sei promulga diploma ida ne’e, iha prazu loron ualu nia laran, hahú hosi loron ne’ebé nia simu.

Ho baze legal ne’e, gosta ka la-gosta, interese ou la-interese, Xefi Estadu Taur Matan Ruak tenki promulga antes loron ualu hanesan konstituisaun hatete.

Ukun nain sira ne’ebé loron ba loron ‘istori malu’ ho polítika, hahú hosi palasiu prezidensial to’o governu ho ninia viziñu parlamentu nasionál tenki hanoin katak, RDTL ne’e sai nasaun la’os buat fasil ou labele hanoin ukun-án ida ne’e Indoneziu sira fó de’it hanesan prezente ba Timor-oan sira.

Maibé, independênsia ne’e liu-hosi prosesu ne’ebé naruk ate ema lubun balun mak lakon vida, hamosu faluk no oan ki’ak sira e to’o agora asu-wain sira nian mate ruin kontinua lekar, triste liu balun seidauk rekolla ninia mate ruin.

Saida mak asu-wain funu nain sira halo ba povo no nasaun ida ne’e, ukun nain sira koko atu banati tuir, hodi hametin lia-fuan furak ida mak liberta povo hodi ki’ak, mukit, analfabetu nomos mal nutrisaun no sira seluk ne’ebé kontinua aperta moris susar.

Haburas demokrasia nudar parte ida. Mais importante mak kontinua hametin estadu direitu demokratiku ho objetivu ikus mak haree ba povo nia moris di’ak.

Agora, oinsá mak ukun nain sira atu tane a’as interese povo duke interese grupu no partidaria. Tempu ona, polítiku sira ne’ebé agora dadaun ukun, salva duni interese nasaun.

Tempu mos to’o ona atu polítiku sira pratika polítika honestu. Husik ego ou idealisme polítiku ne’ebé laiha ninia objetivu klaru e a’at liu la-apar ho situasaun povo Timor.

Entretantu, mudansa polítiku ho konsensus polítiku bele sai mata-dalan ida atu aselera prosesu dezenvolvimentu nasionál. Mais pratika ne’ebé la’o dadaun, públiku konsidera fahe poder ba malu nomos hametin ida-idak ninia ukun ou kadeira.

Realidade sira ne’e, festa demokrasia mos besik dadaun ona. Importante liu ba ‘intelektual’ sira, hahú kada familia, bairu, aldeia no suku husik ego no idealisme sira atu matan moris hodi halo selesaun ba partidu hotu ne’ebé sei kompete iha eleisaun jéral 2017. Nasaun ka ego? Ita Hein. (*)

´Realidade’ Ukun-án

Bainhira povo ne’e hanoin ukun-án, Repúblika Demokratika Timor-Leste (RDTL) ne’e sei defende moris di’ak. Ho mehi ne’e, bainhira loron konsulta popular, maioria Timor-oan ho aten barani atu halo determinasaun.

Restaurasaun independensia ne’ebé atu kumpleta tinan 14 no determinasaun ho Indonezia atu la’o ba tinan 16, povo sira iha área rurais ne’ebé ho hanoin ida de’it mak, oinsá bele moris livre ba tos no natar, kontinua moris mukit. Ki’ak ba infrastrutura baziku sira hanesan bee mos, estrada, edukasaun nomos saúde.

Durante periode ukun-án, estadu ida ne’e liu-hosi orgaun ezekutivu kontinua husu osan ba legislativu sira atu aprova osan ba prosesu dezenvolvimentu nasionál. Hahú hosi governasaun Aliansi Maioritaria Parlamentar to’o mai kontinuasaun governasaun ne’ebé lidera hosi Primeiru Ministru, Rui Maria de Araújo nafatin tau prioridade orsamentu iha mega projetu sira.

Estrada, bee mos, edukasaun no saúde konsidera importante, mais pratikamente la-aumenta iha ninia verbas. Realidade mak hatudu, tinan-tinan bainhira tempu bai-loron, maioria populasaun área remotas laiha bee mos. Ezemplu de’it fatin turismu suco Tutuala, postu administrativu Tutuala, munísipiu Lautem, maioria populasaun susar tebes atu hetan bee mos. Aldeia balun mak asesu, mais tenki la’o kuaze kilometru lima.

Inan feto sira ne’ebé ‘hahoris’ jerasaun nasaun, kontinua hasoru problema hodi asesu ba sentru saúde ou hospital referral sira, tanba de’it estrada no mínimu fasilidade ambulansia hodi atende pasiente iha área izoladu.

Futuru ba nasaun sira ne’ebé mai hosi povo kbi’it la’ek, kontinua laiha kondisaun dignu atu asesu edukasaun ne’ebé ho kualidade. Eskola balun nafatin hala’o prosesu aprendizajen iha loron no udan laran, falta karteiras, livru no profesores.

Mesmu mosu halerik oi-oin hosi povo, autoridade lokal, parte akademika to’o sosiedade sivil, mais hirak ne’e hotu la-hafanun ukun nain sira nian sentimentu umanu ba ninia povo sira. Orgaun soberanu sira tau liu interese polítiku no grupu ba desizaun polítika sira.

AGORA, Orsamentu Jéral Estadu 2016 ne’ebé veta hosi Prezidenti Repúblika Taur Matan Ruak no hetan hikas reafirmasaun polítika iha uma fukun Parlamentu Nasionál, ho esperansa mak povo sei hetan duni ninia benefisiu.

Esperansa, esperansa no esperansa. Mais durante ne’e, Organizasaun Naun Govermentais, La’o Hamutuk konsidera, verbas ne’ebé governu aloka ba projetu tasi mane nomos projetu pilotu Zona Ekonomia Espesial Sosial Merkadu (ZEESM) laiha benefisiu ba povo ne’e.

Depois reafirmasaun unaminidade ba daruak iha uma fukun, públiku kontinua hein, sa desizaun mak Xefi Estadu Taur Matan Ruak atu foti hodi hatan ba povo nomos polítiku nain sira. Ita Hein. (*)