Diskursu iha atribuisaun karteira profissionál

Salaun Delta Nova, 20 - 12 - 2019

Rita Almeida, jornalista hosi Tatoli, IP.

Ha’u nian respeitu ba reprezentante Sekretáriu Estadu Komunikasaun Sosiál (SEKOMS).

Ha’u nian respeitu ba diretór sira hosi meius komunikasaun sosiál sira ne’ebé marka prezensa.

Jornalista Tatoli, IP foto hamutuk ho sira-nian Prezidente.

Ha’u nian respeitu ba Prezidente Konsellu Imprensa ho ninia membru sira no mós ezekutivu sira no kolega sira iha Konsellu Imprensa.

Ha’u nian respeitu ba parseiru mídia sira ne’ebé durante ne’e apoiu prosesu hametin liberdade imprensa no profesionalizmu ba atividade jornalístika, no mós instituisaun Estadu sira ne’ebé durante ne’e sai ona parseiru hodi fornese informasaun ba mídia sira.

Ha’u nian orgullu ba kolega jornalista sira ne’ebé hala’o sira nian knaar, mesmu hasoru difikuldade oioin.

Loron di’ak.

Dahuluk, hakarak agradese ba konfiansa hosi Konsellu Imprensa ne’ebé kontakta ha’u, reprezenta kolega sira hato’o hanoin balun iha momentu ida ne’e.

Belun jornalista sira

Profisaun ne’ebé ita hili garante iha ita-nian konstituisaun artigu 50. Hosi profisaun ne’e, ita-nian atividade sira asegura mos iha lei-inan artigu 41 ne’ebé ko’alia kona-ba liberdade imprensa no komunikasaun sosiál ninian.

Hosi konstituisaun, hahoris lei númeru 5/2014 lei komunikasaun sosiál iha artigu rua ne’ebé ko’alia kona-ba definisaun no artigu tolu sita kona-ba kna’ar komunikasaun sosiál nian. Artigu importante seluk mak ualu, haktuir saida mak liberdade imprensa.

Simu karteira hosi Prezidente KI, Virgilio Guterres.

Momentu istóriku iha loron kmanek ida ne’e, hodi haforte ita-nian atividade ne’ebé define iha lei númeru 5/2014 artigu 2 ne’ebé ko’alia kona-ba definisaun no artigu 3 knaar komunikasaun sosiál no artigu 4 dever sira komunikasaun sosiál, atu hametin ninia baze ho kredibilidade mak karteira profesionál.

Signifika, karteira profesionál ne’ebé iha ita ida-idak nia-liman hanesan mós karta kondusaun. Ho ninia sentidu ita aprovadu hosi exame sira kona-ba regra hotu hosi sinais tranzitu. Kabe ba atividade jurnalistika mak hatene ho didiak saida mak lei sira ne’ebé vigor iha Repúblika ida ne’e, hatene didiak saida mak kodigu konduta no regra sira seluk ne’ebé entidade públiku no privada sira estabelese, exeptu ba interese públiku.

Maluk doben jornalista sira

Foto hamutuk iha salaun Delta Nova.

Karteira profesionál vale liu kuandu ita nian produtu jurnalístiku muda ema-nian pensamentu no polítiku nian desizaun ba interesse ema barak nian.

Mesmu laiha grau ba ema ida-idak nian kareira, tanba lei ou estatutu KI la mensiona, momentu oportunu ne’e, sujere ba Konsellu Imprensa hodi konsidera jornalista sira-nian hakat iha profisaun ida ne’e.

Jornalista Tatoli, IP.

Atu konklui, haforsa karteira profesionál ninia sentidu hodi hametin profesionalizmu jornalista, la’ós ho surat-tahan ne’e de’it maibé oinsá hamosu ‘ezijensia’ ida dignifika atu profisaun ne’e bele iha kredibilidade hodi kontribui informasaun ne’ebé kualidade ba públiku no mós ba kompañia mídia ne’ebé jornalista ne’e haknaar án ba.

Ikus liu, husu ba públiku no konsellu imprensa atu kontinua akompaña lalaok sira ne’ebé simu ona karteira profissionál atu la’o nafatin tuir regra sira no tempu ona atu toma atensaun ba jornalista sira ne’ebé ho intensaun hodi viola kodigu konduta ba interesse grupu ka partidária.

Maluk sira,

Mídia forte no ho kualidade de’it mak bele salva povu no Nasaun ida ne’e.

Obrigada ba atensaun tomak.

Literacia em Timor-Leste Precisa Mais de Atenção

Dados estatísticos da Direção-Geral de Estatística mostram que o nível de literacia em Timor-Leste ainda não subiu significamente, porque durante sete anos (2007 – 2014), só aumentou 4%.

Espíritu Patriotizmu Sei Iha Ka La’e?

Espresaun pesoál, la reprejenta instituisaun ne’ebé haknaar án.

Hakilar mate ka moris ukun rasik án ho konsekuénsia lakon vida, família, dignidade, no hela ho ‘fitar’, la’ós atu hetan previléjiu iha momentu ida agora.

Luta ba interese komun. Karton hosi google

Maibé indepéndensia ida ne’e atu kumpre prinsípiu oinsá kore povu hosi kiak, mukit no injustisa sosiál iha sosiedade nia leet.

Tanba ne’e, ispíritu patriotizmu presiza hamanas fila fali hodi serbí. Nune’e, serbí povu la’ós tenke ho slogan oportunidade, maibé hakbiit ho responsabilidade.

Kualidade espresaun exelénsia la’ós parte ida hosi previléjiu, maibé ne’e hanesan responsabilidade morál hodi sai ezemplár. Katak, exelénsia ne’e tenke exelente duni iha kualker maneira polítika.

Nune’e mós lia-fuan distintu ne’ebé prega ba reprejentante povu sira iha uma fukun lakon ona ninia sentidu loloos.

Faktu hatudu, durante debate orsamentu jerál Estadu 2018 iha jeneralidade no espesialidade, sira ne’ebé lori tittlu nu’udar matan, ibun no tilun ba laiha kbiit no lian, balun lakon respeitu ba malu hodi ignora povu nia direitu hodi haree kualidade nu’udar reprejentante povu, hodi hasees tiha títulu ida naran distintu.

Previléjiu hosi títulu sira hanesan exelénsia no distintu, polítiku sira tenke respeita nafatin nu’udar kompromisu ida hodi serbí Nasaun no povu ho exelente nu’udar lalenok hosi Estadu ida ne’e.

Tinan 19, Repúblika Demokrátika Timor-Leste (RDTL) tama ona ba idade adultu, maibé povu seidauk sente loloos ukun án ida ne’e. Tanba, sira ne'ebé laiha kbiit seidauk asesu edukasaun no saúde ho kualidade. Hirak ne’e hotu, tanba exelénsia no distintu sira kontinua ‘ukun’ ho oportunidade.

Tempu ona polítiku sira ukun no serbí ho espíritu patriotizmu. Espíritu ida ne’e de’it mak nu'udar edukasaun ida ne’ebé sei sai istória osan mean hosi tempu ba tempu.

Boa noite

Kalan Kmanek

Editorial Ikus ba diariu Timor Post

Depois Lere, Agora Xanana

DEPOIS Prezidenti Repúblika halo ezonerasaun ba maijór jenerál FALINTIL-Forsa Defesa Timor-Leste, Lere Anan Timur, ho intensaun klarifika ho legalmente iha uma fukun Parlamentu Nasionál. Maibé, hamosu rezultadu mak ema balun sente ofendidu ba mensajen ne’ebé halo iha loron 25 fulan-fevereiru foin lalais ne’e.

Ho mensajen ne’e konvida reasaun oi-oin. Hahú ho bankada parlamentár Congresu Nasionál Rekonstrusaun Timor (CNRT) hodi konsidera mensajen Xefi Estadu la-refleta sentidu Estadu ne’ebé garante dame no hakmatek.

La’os de’it CNRT, liu-hosi plenária parlamentár, segunda, (29/2) bankada FRETILIN mos hato’o reasaun.

“Tuir ami nia vizaun koezaun polítika nu'udar fundamentu Estadu importante ba prosesu konstrusaun hametin Estadu, tanba esperénsia hatudu ona mai ita katak bainhira laiha koezaun polítika mak ema seluk bele uza hodi hafera ita nia koezaun hodi lori krize oi-oin hodi impata ita nia prosesu hametin Estadu hodi lori dezenvolvimentu nasionál”, deputadu Francisco Miranda Branco hosi bankada FRETILIN deklara iha plenária.

Entretantu, pesoál ne’ebé direitamente sente ‘ofendidu’, eis Prezidente Repúblika, eis Primeiru Ministru no atuál Ministru Planu Investimentu no Estratejiku (MPIE), Kay Rala Xanana Gusmão, hato’o mos reasaun.

“Medalla ne’e ba pesoál ne’ebé konsiderasaun Estadu nian ba pesoal ida, nia haree katak sé medalla ne’e orgaun prezidensias mak fó rekoñesementu ba papel individu ida nian, propriu orgaun ne’e mak hasai deklarasaun balun dereitamente ba pesoál ne’e no sente des-valoriza ba ninia-án, entaun la-presiza no la-merese ita halo teatru ho medalla ne’e ba pesoál ida, sé ita nia laran karik konsidera pesoál ne’e hanesan ema ne’ebé númeru ida ba luta, nusa mak ita tenke valoriza nia ho medalla ne’e, ne’ebé nia iha direitu tomak atu devolve”, deputadu bankada CNRT, Aderito Hugo da Costa, ba jornalista sira iha PN, segunda, (29/2).

Tempu kuaresma importante ba lider sira atu eduka fuan hodi halo karidade, jejún, no reza maka’as nu'udar sarani Katolika, hanesan mensajen ne’ebé Papa Francisco I hasai ba momentu ne’e. Pasiensia ba malu, perdua malu liu-hosi dalan diálogu ou maneira saida de’it mak dalan di’ak hodi hatudu ezemplu ba povu.

Tuir loos klarifikasaun ba ezonorasaun Lere remata ona iha uma fukun, maibé to’o ikus konvida lider karismatiku, Xanana Gusmão, devolve medalla Grande Colar da Ordem de Guerrilha ne’ebé simu iha tinan kotuk.

Agora mosu figura diplomata, José Manuel Ramos Horta, buka hela dalan oinsá lori sira ne’ebé funu atu hamutuk, buka hakotu des-intementu. 

Espera, José Ramos Horta bele nahe biti boot ba sira ne’ebé hamosu polemika. Tanba, haree ba mai, povu komesa baruk no kole ona ho polítika ne’ebé hatudu. (*)

Mensajen ka Oportunidade

“Proposta ne’ebé governu aprejenta mak rekondusaun. Ha’u la-konkorda ho rekondusaun. Ha’u esplika, karik iha rekondusaun, implikasaun primeiru mak koronel sira no jenerál Filomeno Paixão mos laiha promosaun, tanba kontinua nafatin iha sira nian fatin”, Prezidenti Repúblika, Taur Matan Ruak, iha ninia esplikasaun ba Parlamentu Nasionál, Kinta, (25/2).

Agora ita haree fali saida mak Maijór Jenerál Lere Anan hatete. “Estatutu forsa armada nian mak maijór jenerál iha mandatu ba tinan haat, maibé governu fó konfiansa nafatin, bele hanaruk dala ida tan”, Lere ba jornalista sira liu-hosi konferênsia imprensa ne’ebé hala’o iha kuartel jerál FALINTIL-FDTL Fatuhada, Kuarta, (24/2).

Liga ba deklarasaun sira ne’e, governu liu-hosi ministru defesa tenke halo esplikasaun legál ba públiku, nune’e ema hotu bele esklaresidu. Aleinde ne’e, solusaun ba polemika desizaun Prezidente Repúblika nu'udar Komandante Supremu Forsa Armada nian mak tribunál rekursu hodi estuda ninia konstitusionalidade.

Entretantu, Xefe Estadu bainhira halo mensajen iha uma fukun Parlamentu Nasionál nu'udar orgaun soberanu ida, hosi orgaun soberania tolu seluk, para esklarese ninia desizaun, hamosu deskontente hosi ninia ‘adversariu’ sira.

Kontra ataka halo kedas hosi bankada Congresu Nasionál Rekonstrusaun Timor (CNRT). “Bankada CNRT ezije formalidade no labele uza improvizaun polítika. Prezidenti da Repúblika uza espasu públiku hodi halo atakes no insultu pesoal sem fundamentu ba lider nain rua mak, maun bo’ot Kay Rala Xanana Gusmão nu’udar Prezidente partidu mais votadu, CNRT no Maun Mari Alkatiri nu’udar Sekretariu Jéral Partídu FRETILIN” deputadu Aderito Hugo da Costa komenta iha konferênsia imprensa ne’ebé halo iha bankada parlamentar CNRT, Kinta, (25/2).

Tuir loloos, nu'udar aman ba nasaun, PR la-devia atu utiliza ‘oportunidade’ halo ataka. Hanesan Xefe Estadu, devia hato’o mensajen ba nasaun tenke reflete ba dame no hakmatek. Maibé, kontrariu, tanba ema balun sente ofendidu no konsidera hanesan defamasaun.

Loos duni, prátika polítika susar atu ema deskobre. Hirak ne’e bele konsidera Taur Matan Ruak, Lere Anan Timur, Xanana Gusmão, Mari Alkatiri, Lu-Olo no Ramos Horta halo hela ‘lasu’ hodi hatudu ba nasaun seluk katak, mesmu sira hamosu diferénsia ideia ba superior sira iha forsa armada, maibé forsa sira kontinua mantein pozisaun hodi fó hakmatek ba povu sem mete ba polítika.

Tanba ne’e, jerasaun sira tenke hakmatek atu estuda deklarasaun polítika sira ne’e. Situasaun ne’e hanesan osan mean ba foin sa’e sira atu aprende di’ak liu-tan polítika hodi sai lideransa ba aban bainrua.

Mesmu nune’e, tempu ona atu lider sira, li-liu Taur Matan Ruak, Xanana Gusmão, Mari Alkatiri, Lu-Olo no seluk tan atu hatudu ‘kualidade’ polítika ba povu, la’os ho polítika ataka malu no utiliza oportunidade iha fatin ne’ebé la-merese. Ita Hein. (*)

PR iha PN

Sistema ne’ebé Repúblika Demokrátika Timor-Leste (RDTL) opta ho semi prezidensial ko’alia klaru ona iha konstituisaun. Katak, Prezidenti Repúblika, Parlamentu Nasionál, Governu no Tribunál, ida-idak ho ninia kompetênsia tuir lei inan haruka.

Saida mak ko’alia iha artigu 74 kona-ba definisaun, alinea 1) Prezidente Repúblika mak Xefi Estadu, símbulu no garantia independênsia nasionál no unidade estadu nian ho funsionamentu regular instituisaun demokrátika sira. Alinea 2) Prezidente Repúblika mak Komandante Supremu Forsas Armadas nian.

Liga ba baze legal sira ne’e, Xefi Estadu, Taur Matan Ruak, ho kompetênsia hanesan Komandante Supremu Forsas Armadas nian, foti desizaun hodi nomeia Brigadeiru Jenerál Filomeno Paixão ba Majór-Jenerál FALINTIL Forsa Defesa Timor-Leste (F-FDTL) no Majór-Jenerál Lere Anan Timur promove ba postu Onorífiku hanesan Tenente-Jenerál.

Desizaun ne’e halo polemíka iha públiku nia le’et no konvida reasaun deklarasaun polítika hosi uma fukun Parlamentu Nasionál to’o Palasiu Governu.

La’os ne’e de’it, prosesu ‘dada malu’ ba dalan legal mos akontese. Governu liu-hosi Ministru Defesa nudar nain ba proposta ne’ebé Prezidenti Repúblika ‘ignora’, lori desizaun ne’e ba Tribunál Rekursu atu oinsá jurista sira estuda konstitusionalidade ba Xefi Estadu ninia pontu de vista.

Prosesu ne’e haree ba mai hanesan sorte di’ak ba polítiku sira hodi rekolla ‘bala’, nune’e aproveita tempu konsolidasaun partidu no eleisaun jéral ne’ebé besik dadaun.

Kestaun seluk ne’ebé hamosu situasaun sira ne’e mak krize komunikasaun entre orgaun soberanu sira nomos inkapasidade hosi ema sira ne’ebé servisu iha palasiu prezidensial, palasiu governu, mesmu fulan-fulan simu salariu boot, maibé lakon responsabilidade boot ba asuntu sensitivu sira. Situasaun sira ne’e presiza halo avaliasaun ba servisu nain profesionál sira iha palasiu prezidensial no governu, atu labele akontese fali ba futuru.

Ho inkapasidade hirak ne’e hotu, Prezidenti Repúblika, Taur Matan Ruak, tenke hatan no esplika ninia desizaun ba reprejentante povu iha uma fukun Parlamentu Nasionál (PN), Kinta, (25/2) ohin, ho transmisaun direita hosi Radio Televisaun Timor-Leste.

Transmisaun ne’e sei konvida ema hotu nia atensaun hodi rona no haree direitamente razaun legal saida mak Xefi Estadu hanesan mos Komandante Supremu Forsas Armadas nian foti ba ninia desizaun.

Hadi’a komunikasaun nudar dalan importante ba orgaun soberanu sira hodi hametin prosesu demokrasia iha rai laran. Polítika sira labele utiliza situasaun ne’e hodi halo fahe malu. Maibé, tenki matenek atu haree situasaun atual ne’ebé akontese iha rai laran. Ita Hein. (*)

Kontra Governu Austrália La’os Povo

Movimentu Kontra Okupasaun Tasi Timor (MKOTT) ne’ebé kompostu hosi estudante universitariu sira, sosiedade sivil, lider polítiku, reprejentante povo no entidade hotu, Tersa, (23/2) ohin, sei realiza manifestasaun kontra governu Austrália iha embaixada nasaun Kanguru ne’ebé lokaliza iha Fatuhada, Komoro.

Durante asaun kontra governu Austrália, MKOTT sei aprejenta pontus prinsipal haat mak hanesan respeita soberania Repúblika Demokratika Timor-Leste (RDTL) hanesan nasaun sira seluk, husu ba nasaun viziñu ne’e atu fila fali ba mekanismu disputa fronteira maritima liu-hosi juridisaun tribunál internasionál.

Aliende ne’e, pontus seluk ne’ebé movimentu ne’e aprejenta mak husu Austrália atu halo negosiasaun ho vontade di’ak, labele ho interese. Nune’e mos, husu atu labele uza poder polítiku no ekonomia iha rejiaun ne’e atu na’ok nafatin Timor-oan sira nian riku soin.

”Ita hatene katak, ita la’os kontra povu Austrálianu, maibé ita kontra polítika governu Austrália nian ne’ebé mak nafatin no lakohi halo fronteira marítima ne’ebé justu mai ita no ita hatene katak, forsa iha ba MKOTT iha Dili ne’e mak ativista Austrálianu no rai seluk nian ne’ebé hela iha fatin seluk no halo asaun hanesan ita halo”, Portavoz MKOTT Juvinal Dias ba jornalista sira iha edifisiu La’o Hamutuk iha Bebora Dili.

Tempu ona, governu Timor-Leste halo ‘ezijensia’ ba governu Kanguru hodi ko’alia kona-ba tratadu Certain Maritime Arrangement in the Timor Sea (CMATS).

Entretantu, ko’alia asuntu petroliu, estadu ida ne’e, liu-hosi entidade oi-oin tenki matenek liu atu halo negosiasaun ida ne’ebé labele estraga estratejia polítika hodi manan Austrália.

La’os fasil atu muda governu Austrália nia hanoin hodi rona povo Timor-Leste. Maibé, difikuldade ida ne’e, labele atu satan ispiritu para hatutan fali luta foun hodi manan soberania total ba nasaun nian moris di’ak.

”Ita respeita teb-tebes soberania estadu Austrália ninian, ita husu sira mós respeita soberanu Timor-Leste ninian”, Aderito Hugo da Costa nudar Segundu Vise Prezidenti Parlamentu Nasionál ba jornalista sira iha PN, Segunda, (22/2).

Nasaun ne’ebé de’it, atu ki’ik ka bo’ot, obrigasaun atu respeita soberania rai seluk nian. Hanesan Austrália, presiza loke fuan hodi rona povo Timor ninia preokupasaun.

Agora, ukun nain sira, li-liu negosiadór Kay Rala Xanana Gusmão presiza hametin unidade ba dala ida tan hodi hasoru ‘inimigu’.

Nune’e mos, entidade hot-hotu, dala ida tan atu husik interese saida de’it ba kotuk atu ka’er liman hamutuk, buka apoiu solidaridade, tantu hosi Austrália rasik no rai seluk ne’ebé ho influensia atu muda viziñu ne’e ninia hanoin. Ita Hein. (*)